تېره ورځ په دایکندي ولایت کې د افغانستان د ژورنالیستانو د ملي اتحادیې ولایتي دفتر د (په دایکندي کې د خبریالانو خوندیتوب) تر نامه لاندې ناسته کې د دولتي ادارو مسوولینو، خبریالانو او د رسنینو مدیرانو په ګدون سره، په یاده ناسته کې د خوندیتوب لارښود کتابونه ووېشل شول.
په دایکندي کې د افغانستان د ژورنالیستانو د اتحادیې استازي سید محمد انور شهاب وویل: جګړو زموږ د هېوادوالو په ځانګړې توګه د خبریالانو ژوند په خطر کې اچولی دی. پر همدې دلیل د افغانستان دژورنالیستانو ملي اتحادیې خبریالانو ته د خوندیتوب لارښود چمتو او د افغانستان په سطح یې ووېشل.
د ښاغلي شهاب پر وینا: له نوموړي لارښود څخه په ګټه اخیستنې سره، خبریالان کولای شي د خپل خونديتوب کچه لوړه کړي.
د دایکندي ولایت د اطلاعاتو و فرهنګ رییس محمد حسین سیرت ویلي دي، چې دولت او د خبریالانو صنفي بنسټونه باید د خبریالانو د خوندیتوب لپاره لازم اقدامات ترسره کړي.
نوموړي په دایکندي کې د حکومت او رسنیو د ګډې کمېټې جوړېدل، او د خوندیتوب لارښود چمتو کول، یو لدې ډول ګامونو یاد کړي دي.
د نوموړې خبري ناستې یوه بل ګډونوال رضا واحدي د نسیم رادیو مسوول وویل: په دایکندي کې خبریالان د ځینو له تحدید، تحقیر او حتا له وهل او ډبولولاندې راغلي دي.
ښاغلي واحدي، د نسیم رادیو پر ودانۍ د تېر کال برید ته په اشارې سره له حکومت وغوښتل، چې په جدي ډول د رسنیو او خبریالانو خوندیتوب ته پاملرنه وکړي.
همدارنګه په نیمروز ولایت کې د اتحادیې ولایتي دفتر خبریالانو ته خبریالانو ته د خوندیتوب لارښود کتابونه ووېشل.
په نیمروز ولایت کې د افغانستان د ژورنالیستانو ملي اتحادیې استازي احمدشاه صابر وویل: په هغه ناسته کې چې د یاد لارښود د وېشنې په خاطر جوړه شوې وه، د سیمییزو رسنیو خبریالانو، عالېم مېډیا، د دوست غږ رادیو، د برنا تلوېزون، ملي تلوېزون او د پژواک خبریالانو پکې ګډون درلود.
د ښاغلي صابر په وینا: د نیمروز ولایت خبریالانو له اتحادیې غوښتي، ترڅو دوی ته حرفه یي زده کړیز پروګرامونه چمتو کړي.
همدارنګه په پروان ولایت کې پر خبریالانو د خوندیتوب لارښود کتابونه ووېشل شول.
پر هغه ناسته کې چې پر دې ماسبت جوړه شوې وه، د پروان ولایت مقام استازي شاولي شاهد، د نوموړي ولایت ویانده وحیده شهکار، د سیمییزو رسنیو مدیرانو او خبریالانو ګډون درلود.
په پروان کې د اتحادیې استازي عباد سعادت وویل: پدې ناسته کې د خوندیتوب لارښود وېشلو ترڅنګ، ګډونوالو ته د اتحادیې د کړنو او لاسته راوړنو په اړه معلومات وړاندې شول.
د ناستې په یوه برخه کې، د پروان ولایت مقام استازي شاه ولي شاهد د افغانستان د ژورنالیستانو د ملي اتحاديې د کړنو په باب وویل: د افغانستان د ژورنالیستانو د ملي اتحادیې کړنې د خبریالانو د مرسته کوونکو نهادونو ترڅنګ د ښه تاثیر او اهمیت درلودونکې ده، او د نوموړي نهاد پروګرامونه د هېواد د رسنیو د ظرفیت په وده کې توانېدلې، چې د قناعت وړ چاپېریال جوړ کړي.
پدې ناسته کې حاضرو خبریالانوپداسې حال کې چې د نوموړي لارښود څخه یې ستاینه کوله، له اتحادیې یې غوښتي، چې د یادلارښود زیات شمېر کتابونه نوموړي ولایت ته ولېږي، تر څو هغو خبریالانو ته ورسېږي، کوم چې په ولسوالیو کې فعالیت کوي.
