په تېرو ورځو کې د فراه او کندز ولایت خبریالانو ته د خوندیتوب لارښود ووېشل شول.
د نوموړي لارښود وېشنه له یوې میاشتې راپدې خوا شیروع شوېده، چې اوس مهال نږدې د شلو ولایاتو سیمییزو خبریالانو ته وېشل شویدي.
په هغه غونډه کې، چې پر همدې مناسبت د افغانستان د ژورنالیستانو د ملي اتحادیې د ولایتي دفتر له لوري د فراه ولایت د مطبوعاتو ریاست په انګړ کې جوړه شوې وه، د خوندیتوب لارښود د وېشنې ترڅنګ یې د فراه ولایت د ژورنالیستانو او رسنیو د امنیتي مشکلاتو په اړه هم خبرې اترې وشوې.
په فراه ولایت کې د افغانستان د ژورنالیستانو د ملي اتحادیې مسوول احمدشاه فطرت وایي: د روان کال په جریان کې په فراه ولایت کې د ژورنالیستانو پر وړاندې د تاوتریخوالي شپږ قضیې ثبت شوې دي، چې د تېر کال په پرتله د نوموړو قضیو په شمېر کې کموالی راغلی دی.
د نوموړي په وینا(د نوموړي لارښود په استفادې سره، د فراه ولایت خبریالان کولای شي چې په کاري چاپېریال او هم د خبري پوښښ پر مهال د خپل خوندیتوب کچه لوړه کړي.
پدې ناسته کې د فراه ولایت د اطلاعات او فرهنګ رییس فرید احمد ایوبي هم خبرې وکړې، د ژورنالیستانو له ملي اتحادیې یې د خوندیتوب لارښود له جوړولواو وېشلو مننه وکړه، او داسې یې وویل:( د فراه سیمییز بنسټونه د خبریالانو پر وړاندې د تاوتریخوالي د قضیو په اړه وعده کوي، چې د دې قضو پلټنه په کوي او د دې ډول قضیو د مخنیوي لپاره به پاڅون کوي.
د غونډې په پای کې له شل زیاتود سیمییزورسنیو په کارکوونکو او خبریالانوپه پښتو او دري ژبو د خوندیتوب لارښوونکی ووېشل شول.
همدارنګه په کندز ولایت کې هم خبریالانو ته د خوندیتوب لارښود ووشل شول.
په کندز ولایت کې د افغانستان د ژورنالیستانو د ټولنې مسوول رحمت الله حرمت وایي: پر هغه ناسته کې چې پر همدې مناسبت جوړه شوې وه، د سیمییزو رسنیو، عمومي، او څو تنو هغو خبریالانو چې نړیوالو رسنیو ته د شمال شرق زون خبرونه پوښښ ورکوي ګډون کړی وو.
پدې ناسته کې چې د کندز ولایت د فرهنګ او ارتباط په مرکز کې جوړه شوې وه، ګډونوالو له سیمییزو ادارو وغوښتل چې د خبریالانو امنیت او خوندیتوب ته زیاته پاملرنه وکړي.
