۱۹۵ مه اعلامیه
هغه نندارتون چې نن د لوړو زده کړو وزارت لخوا په لاره اچول شوی وو، یو شمېر خبریالان د یاد نندارتون د خبري پوښښ په ترځ کې له تاوتریخوالي سره مخامخ شول.
نوموړي خبریالان، چې د نندارتون د خبري پوښښ لپاره راغلي وو، د ولسمشر د ساتونکو لخوا، چې بي بي ګل یې بدرګه کوله ووهل شول.
همدې ته ورته په یوه بله پېښه کې د خورشید تلویزون خبریال امید دولت زی، چې د یوه خبري پوښښ لپاره د ټاکنو خپلواک کمېسیون ته تللی وو، د یاد کمېسیون د ساتونکو لخوا ووهل شو.
د افغانستان د ژورنالیستانو ملي اتحادیه پداسې حال کې، چې یاد تاوتریخوالي غندي، او د هېواد د نافذه قوانینو خلاف یې بولي. او له مسوولو بنسټونو غواړي، چې د دغه تاوتریخوالي عاملین په جدي توګه وڅاري.
نوموړې اتحادیه هیله منده ده ترڅو د حکومت او رسنیو ګډه کمېټه، چې د خبریالانو او رسنیو امنیت د خوندیتوب په هدف رامنځ ته شوېده، دغو قضیو ته په جدي توګه پاملرنه وکړي.
د افغانستان د ژورنالیستانو د ملي اتحادیې اجرایه شورا
