د ترهګرو لخوا په شمشاد تلویزون د برید په پای کې د امنتي ځواکونو له لوري ترهګر ووژل شول.
نن سهار په کابل کې د شمشاد تلویزون په ودانۍ دوو ترهګرو برید وکړ، چې یو یې د شمشاد تلویزون د ساتونکو له لوري او بل یې هم د امنیتي ځواکونو له لوري ووژل شو.
د شمشاد تلویزون مدیر (نسیم پښتون) په وینا، په دې برید کې د دې تلویزون یو تخنیکي کارکوونکی او یو ساتونکی ټپي شوي او د نوموړي تلویزون یو بل ساتونکی شهید شوی دی.
د کابل د پولیسو مسوولین وایي، چې د دې برید په جریان کې د پولیسو یو مامور ټپي شوی او د شمشاد تلویزون یو شمېر کارکوونکي د ښيښو د رالویدلو او په دیواله د ختلو په وخت کې سطحي ټپي شوي دي.
د افغانستان د ژورنالیستانو ملي اتحادیې، چې د دې برید په تړاو یې اعلامیه خپره کړېده، پر شمشاد تلویزون د ترهګرو برید یې د بیان په آزادۍ برید ګڼلی دی.
د دې اتحادیې رییس ښاغلي دشتي وایې: د شمشاد تلویزون له ډېره وخته د ترهګرو تر تهدید لاندې و، مګر له نیکه مرغه په نني برید کې ترهګر خپل هدف ته ونه رسېدل، چې هدف یې د یاد تلویزون د کارکوونکو عامه وژنه وه.
