وسلواو کسانو، نن له غرمې وړاندې، په جلال آباد ښار کې د انعکاس رادیو پر ودانۍ او افغان کیبلي شبکې باندې برید وکړ.
د انعکاس رادیو او افغان کیبلي شبکې مسوولین وایي، چې دوې چاودنۍ د دوی د ودانۍ په محوطه کې شوي دي، دوی ټینګار کوي چې پدې پېښه کې یې کارکوونکو ته کوم ځاني زیان ندی رسېدلی، مګر یاد برید مالي زیانونه اړولي دي.
د انعکاس رادیو او کیبلي شبکې مشر همایون لطیفي وایي: ځاني زیانونه نلرو، مګر زموږ وسایلو او تجهیزاتو ته سخت زیان آوښتی دی.
په همدې حال، د لطیفي په وینا، د انعکاس رادیو او د کیبلي شبکې فعالیت ندی درېدلی.
د ننګرهار د پولیسو مسوولین وايي، چې پولیسو سیمه بررسي کړې او د دغه برید د عاملینو د پېژندلو په لټه کې دي.
د ننګرهار د پولیسو قوندانۍ د امنیت آمر، سید عباس سادات وایي: تر اوسه د دې قضیې د عاملینو په اړه کومه نښه په لاس نده راغلې، مګر پدې اړه د موږ هڅې روانې دي.
د انعکاس رادیو نشراتي مسوول، نصرت الله نصرت پداسې حال کې چې وایي، چاودنه له لرې ځایه په کنترول سره رامنځته شوې، له امنیتي ځواکونو څخه، چې د نوموړي په وینا، زر سیمې ته رارسېدلي دي مننه کوي.
ښاغلي نصرت وایي: امنیتي ځواکونو، دریم بم مخکې له چاودنې خنثا کړ.
