د (کاوون غږ) رادیو، مسوول محمد ګلاب ابراهیمي، د لغمان ولایت د پولیسو له لوري وهل شوی دی.
ښاغلی ابراهیمي تېره ورځ، کله یې چې غوښتل، د لغمان ولایت په مرکز مهترلام ښار کې، د روژې په مناسبت د قطر هېواد د مرستې د توزیع له پروګرام خبري پوښښ ترسره کړي، د لغمان د پولیسو له لوري وهل شوی دی.
د ابراهیمي په وینا، په لوموړیو کې پولیس، د توزیع سیمې ته د نوموړي د ننه کېدلو مانع شول او وروسته له هغې یې چې دوی ته ویلي، چې خبریال دی او اصرار یې کړی چې باید له سیمې راپور جوړ کړي، نو وهل شوی او د عکاسۍ کمره یې هم ماته شوې ده.
د افغانستان د ژورنالیستانو د ملي اتحادیې مسوول، شمس الرحمن شمس وایي، چې سږ کال دا دریمه پېښه ده چې په هغې کې امنیتي ځواکونه د خبریالانو پروړاندې تاوترخوالی ترسره کوي.
په کابل کې د افغانستان د ژورنالیستانو د ملي اتحادیې مسوولین وایي، چې د لغمان د پولیسو له قومندان سره د اړیکې د ټینګولو لپاره د دوی هڅې کومه نتیجه نده ورکړې، مګر په کابل کې د کورنیو چارو د وزارت چارواکو ژمنه ورکړې، چې دا مسله به بررسي کړي.
