تېره ورځ، د خبریالانو او رسنیزو همکارانو په یوه لویه ناسته کې د ژورنالیزم ملي اخلاقي موازین تصویب شول.
پدې ناسته کې، چې د افغانستان د رسنیو او خبریالانو د بنسټونو د فدراسیون له لوري جوړه شوې وه، د هېواد له ۳۴ ولایاتو څخه له ۴۰۰ زیاتو خبریالانو او رسنیزو کارکوونکو ګډون درلود.
د ناستې ګډونوالو، د ژورنالیزم د ملي اخلاقي موازینو مسوده، چې د رسنیو او ژورنالیستانو د بنسټونو د فدراسیون له لوري جوړه شوې وه، په دقت او په مختلفو ګروپي کارو سره، یې برسي کړه او په پای کې یې د دغه موازینو نهایي متن ته مثبتې رایې ورکړې.
د ژورنالیزم ملي اخلاقي موازینو د جوړولو او تصویب لپاره په تېرو څو کلونو کې هڅې روانې وې. چې بالاخره، له شپږو میاشتو راپدې خوا، په ۷ لویو ښارونو کې له خبریالانو او رسنیزو کارکوونکو سره مشورتي ناستې ترسه شوې، چې له دغه ناستو څخه یې په هره ناسته کې د همسایه ولایاتو د رسنیو او خبریالانو استازو هم ګډون درلود.
د تېرې ورځې په ناسته کې، د هغو طرحو او وړاندیزونو په نظر کې نیولو سره، چې له ولایتي ناستو څخه په لاس راغلي وو، او د ناستې د ګډونوالو وړاندیزونو ته په کتو سره چې په ناسته کې یې وړاندې کړل، د ژورنالیزم د ملي اخلاقي موازینو( کوډونو) نهایي متن تصویب شو.
د افغانستان د رسنیو او خبریالانو د بنسټونو فدراسیون او همدارنګه پرونیو ګډونوالو ژمنه وکړه، چې وروسته لدې به د خپلو رسنیزو فعالیتونو په لړ کې، دا موازین په جدي توګه په نظر کې نیسي.
اخلاقي موازین، په هغه هېوادونو کې چې دیموکراتیک سیستم لري د رسنیز فعالیت یو با ارزښته برخه شمېرل کېږي او د داسې موازینو تصویب، د لومړي ځل لپاره د افغانستان د ژورنالیزم په تاریخ کې لوی ګام ګڼل کېږي.
