ولسمشر غني، خبریالانو او رسنیزو مسوولینو ته ژمنه ورکړې ده، چې ډېر ژر به د دوی غوښتنېو ته ځواب ووایي.
تېره شپه، د ژورنالیزم د اخلاقي موازینو د تصویب د ناستې ګډونوال، د سلام خانې په قصر کې د ولسمشر میلمانه وو.
په دغه ناسته کې، چې شاوخوا ۳۰۰ خبریالانو، رسنیزو مسوولینو او دولتي چارواکو ګډون درلود، فهیم دشتي او ضیا بومیا د رسنیو او خبریالانو د فدراسیون په استازیتوب وینا وکړه، د ژورنالیزم د ملي اخلاقي موازینو تصویب یې په هېواد کې د رسنیزو فعالیتونو د معیاري کولو لپاره یو لوی ګام بللی او له حکومت څخه د رسنیو او خبریالانو غوښتنې یې له ولسمشر سره شریکې کړې.
د رسنیو د جواز د مهلت تمدید او د رسنیو د تاسیس او فعالیت د طرز او ډول د مقررې تعدیل، چې په رسنیو باندې د جواز د فیس او بانکي ضمانت په عنوان زیات مبلغ تحمیل کوي، د خبریالانو پروړاندې د تاوتریخوالي د قضیو جدي څېړنه، اطلاعاتو ته د لاس رسي د څار کمیسیون ستونزو ته لاس رسی، د ۱۷۰ سیمه ایزو رادیوګانو ستونزو ته لاس رسی، له رسنیو او خبریالانو څخه د ملاتړ د صندوق جوړول او په کابل او ولایاتو کې د خبریالانو د شهرک جوړولو طرحه، له لویو غوښتنو څخه وې، چې له ولسمشر سره شریکې شوې.
ولسمشر ژمنه وکړه، چې ډېر ژر به اطلاعاتوته د لاسي د څار د کمیسیون له غړو سره یوه تخنیکي ناسته ترسره کړي، ترڅو د دغه کمیسیون ستونزې حل شي. د دغه کمیسیون لپاره یوه ځانګړې بودیجه سنجول، د ولسمشر له بلې ژمنې څخه شمېرل کیږي.
همدارنګه ولسمشر ژمنه وکړه، چې د سیمه ایزو رادیوګانو مسوولین به راغواړي، ترڅو د ستونزو د له منځه وړلو لپاره د دوی طرحې بررسي او د دوی د ستونزو د حل لپاره یوه سمه لاره پیدا او عملي کړي.
د رسنیو او خبریالانو د بنسټونو د فدراسیون له لوري د رسنیو او خبریالانو پروړاندې د تاوتریخوالي او د قتل د دوسیو د څېړلو په اړه چې کوم راپور خپور شوی دی، یاد راپور یې د قناعت وړ ګڼلی او ژمنه یې کړې چې ډېر ژر به مربوطه بنسټونو ته هدایت وکړي چې پدې اړه په سرعت او جدیت سره عمل وکړي.
لدې وړاندې د ولسمشر د فرمان پر بنسټ، د کابینې د عدلي او قضایي کمیسیون په یوه ناسته کې، چې د افغانستان د رسنیو او خبریالانو د بنسټونو د فدراسیون د استازو په ګډون ترسره شوې وه، یوه کمېټه، د اطلاعات و فرهنګ او کورنیو چارو د وزارتونو د استازو، د ملي امنیت د ریاست، د لویې څارنوالۍ او د افغانستان د رسنیو او ژورنالیستانو د بنسټونو د فدراسیون د استازو په شمول جوړه شوې وه. نوموړې کمېټې په آتو متوالي ناستو کې، ۶۷۹ دسیې بررسي کړي دي، چې لدې جملې څخه ۴۲۰ دسیې د څېړلو وړ په ګوته شوي دي.
ولسمشر د فدراسیون له استازو وغوښتل، ترڅو د دغه دوسیو په څېړلو کې له کشفي، عدلي او قضایي بنسټونو سره همکاري وکړي.
د رسنیو د جواز د مهلت تمدید او د ټولیزو رسنیو د تاسیس او فعالیت د طرز او ډول د مقررې د تعدیل لپاره، ولسمشر د اطلاعات و فرهنګ وزیر ته، چې د تېرې شپې په ناسته کې یې ګډون درلود، هدایت ورکړ، ترڅو پدې اړه وړاندیزونه برابر او د ولسمشرۍ دفتر ته واستوي ترڅو پدې اړه یو ځانګړی فرمان صادر شي.
ولسمشر له رسنیو څخه د ملاتړ د صندوق د جوړولو په اړه، په خپله مخکینۍ ژمنه ټینګار وکړ او نږدې ده چې د دغه صندوق د جوړولو او استفاده کولو د کړنلارې مسوده، چې د افغانستان د رسنیو او خبریالانو د بنسټونو د فدراسیون له لوري جوړه شوې ده، د ولسمشر له دفتر سره شریکه شي ترڅو پدې اړه عملي ګامونه واخستل شي.
د رسنیو او خبریالانو پروړاندې د ترهګریزو ډلو د ګواښونو زیاتېدو ته په کتو سره، له څو میاشتو راپدې خوا، د رسنیو او خبریالانو د امنیت او خوندیتوب په کړنلارې د افغانستان د رسنیو او خبریالانو د بنسټونو د فدراسیون او د ملي امنیت د شورا له لوري پرې کار روان دی. نوموړې کړنلاره له دوه میاشتې راپدې خوا د ملي امنیت د شورا په اختیار کې دی، مګر تراوسه د هغه له تطبیق څخه کوم خبر نشته.
ولسمشر ژمنه وکړه، چې د یادې کړنلارې د تطبیق لپاره به ډېر ژر د ملي امنیت په شورا کې په دغه مسله بحث وشي.
د رسنیو او خبریالانو د بنسټونو مسوولین، هیله ښکاره کوي، چې ولسمشر د په خپلو ژمنو عمل وکړي او همدارنګه یې اعلام کړی، چې د ولسمشر راکړې هره ژمنه به قدم په قدم بررسي کوي ترڅو مطلوبو نتیجو ته ورسیږو.
