د افغانستان د کارګرانو او کارکوونکو ملي اتحادیې، له یو شمېر خبریالانو او رسنیزو کارکوونکو څخه ستاینه وکړه.
په هغه مراسمو کې، چې د مې د میاشتې په لوموړۍ د کارګرانو نړیواله ورځ او د مې دریمه د رسنیو د آزادۍ د ورځو په بهانه، تېره ورځ د افغانستان د کارګرانو او کارکوونکو د ملي اتحادیې له لوري د نوموړې اتحادیې په ودانۍ کې جوړه شوې وه، رسنیزو مطرح څېرو او خبریالانو ته افتخاري مډالونه او ستاینلیکونه ورکړل شول.
پدې مراسمو کې، د افغانستان د ژورنالیستانو د ملي اتحادیې رییس، عبدالحمید مبارز ته د هېواد د رسنیز مخکښ شخص لقب ورکړ شو او د نوموړې اتحادیې اجرایوي رییس فهیم دشتي، صدیق الله توحیدي او د افغانستان د رسنیو د ملاتړ ادارې (نی) رییس عبدالمجیب خلوتګر د افغانستان د کارګرانو او کارکوونکو د ملي اتحادیې افتخاري مډالونه ترلاسه کړل.
همدارنګه، د مختلفو رسنیو یو شمېر خبریالانو، چې د پېښو او خطرونو په خبري پوښښ کې یې برخه درلوده، د ستاینلیکونو په ترلاسه کولو وستایل شول.
د پرونۍ ورځې د مراسمو ویناوالو، د کارګرانو، کارکوونکو او په ځانګړې توګه د رسنیزو کارکوونکو د امتیازونو او حقونو په ترلاسه کولو ټینګار وکړ او د دغه حقونو د تامین او تظمین لپاره د تقنیني اسنادو د طرحې او تصویب لپاره یې له هڅو خبر ورکړ.
د افغانستان د ژورنالیستانو ملي اتحادیې او د افغانستان د کارګرانو ملي اتحادیې، لدې وړاندې د ملګرتیا تړون لاسلیک کړی دی، چې د هغه تړون پر بنسټ به دواړه بنسټونه د کارګرانو، کارکوونکو او په ځانګړې توګه د رسنیزو کارکوونکو لپاره ګډ فعالیتونه مخته وړي.
