په هغه مظاهره کې، چې نن د کابل ولایت په لویدیځ کې د ترکمنستان د برق د لېږد د لارې په تړاو په لار اچول شوې وه، یو شمېر خبریالان وهل شوي او د کار وسایل یې ورته مات شوي دي.
یاد خبریالان وایي، کله یې چې غوښتل چې په امنیتي مامورینو د مظاهره کوونکو له برید څخه فلمبرداري وکړي او راپور جوړ کړي، نو د غوسه ناکو مظاهره کوونکو له لوري له تاوترخوالي سره مخ شوي دي.
د هېواد له نامتو عکاسانو څخه مسعود حسیني، چې له تاوترخوالي سره مخ شوی دی، په خپله فیسبوک پاڼه لیکلي دي، چې د مظاهرې په لاره اچوونکي(مشران) وایي، چې د خبریالانو پروړاندې تاوتریخوالی د مظاهره کوونکو کار نه وو.
مګر یو شمېر نور خبریالان، چې له تاوتریخوالي سره مخ شوي وو وایي، چې دوی د روښنایي غورځنګ د غړو له لوري وهل شوي او وسایل یې ورته مات شوي دي.
همدارنګه د کابل پولیسو هم د نن ورځې د مظاهره په لړ کې د خبریالانو پر وړاندې تاوتریخوالی تایید کړی دی. د پولیسو چارواکي وایي، چې مظاهره کوونکو د پولیسو پر وړاندې هم بد چلند ترسره کړی او د پل آرتل په ناحیه کې یې د تیږو په وارولو سره یې په دوی برید کړی دی.
د افغانستان د ژورنالیستانو ملي اتحادیې پداسې حال کې، چې د خبریالانو پروړاندې تاوتریخوالی یې غندلی، په اعلامیه کې یې له دولتی بنسټونو د خبریالانو پروړاندې د تاوتریخوالي د عاملینو د محاکمه کولو غوښتنه کړېده.
د نوموړې اتحادیې اجرایوي رییس، فهیم دشتي وایي: د اعلامیې د خپرولو او د دغه قضیې د عاملینو د محکمه کولو د غوښتنې ترڅنګ، امنیتي بنسټونو ته د مکتوب په لیګلو باندې په رسمي ډول دا مساله څېړو.
