په روانه اونۍ کې، د رسنیو د آزادۍ د ورځې په مناسبت، تخاریان د رسنیو په نامه د یوې څلور لارې د نومولو شاهدان وو.
په تخار کې د افغانستان د ژورنالیستانو د ملي اتحادیې د هڅوپر بنسټ او د رسنیزو بنسټونو سره په مشوره، د تخار دولتي مسوولینو او مدني بنسټونو د سپین زر خیابان په ناحیه کې یوه څلور لاره د رسنیو په نوم ونوموله.
په تخار کې د افغانستان د ژورنالیستانو د ملي اتحادیې مسوول، شفیق پویا وايي: له څو میاشتو راپدې خوا هڅه کوو، چې د تخار ولایت مسوولین دې ته راضي کړو ترڅو د خبریالانو په نامه یوه څلورلاره ونومول شي. له نېکه مرغه چې دا طرحه د تخار ولایت د مسوولینو په ځانګړي ډول د تخار د والي له لوري ومنل شوه.
د روانې اونۍ په لړ کې، په هغه محفل کې چې په تخار ولایت کې پدې مناسبت جوړ شوی وو، له څلورو شمال ختیځو ولایاتو څخه د رسنیو استازو پکې ګډون درلود. یاد مراسم د افغانستان د ژورنالیستانو د ملي اتحادیې له لوري جوړ شوي وو او په هغې مراسمو کې یو شمېر دولتي مسوولین، چې له خبریالانو سره یې ښه چلند کاوه د افغانستان د ژورنالیستانو د ملي اتحادیې له لوري وستایل شول. پدې مراسمو کې د تخار ولایت د یو شمېر رسنیو او د ولایتي رسنیو مسوولین، د تخار ولایت د مقام له لوري وستایل شول.
د تخار والي پدې مراسمو کې وویل: موږ په تخار کې د رسنیو دبې سارې خدمتونو او هڅو څخه منندوی یو، چې لږترلږه په تخار ولایت کې د دوی لپاره یو چوک او یوه څلور لاره د( رسنیو څلورلاره) په نامه ونوموو، البته چې دا د کار آخر ندی، بلکه موږ په ټولو اړخونو کې له رسنیو سره همکارۍ ته چمتو یو.
په تخار ولایت کې زیات شمېر صوتي، تصویري او چاپي رسنۍ فعالې دي او د ژورنالیستانو له ملي اتحادیې سره په پوره همغږۍ خپل کارونه پر مخ بیایي.
په تېرو کلونو کې د تخار ولایت رسنۍ له زیاتو ستونزو سره مخ وې، مګر د ژورنالیستانو د ملي اتحادیې په هڅو او د یادې اتحادیې د پروګرامونو په جوړولو سره دغه ستونزې یو څه کمې شوي دي.
