د کابینې عدلي او قضایي کمېټې د شنبې ورځې په ناسته کې، پریکړه وشوه ترڅو د خبریالانو پروړاندې د تاوتریخوالي او د قتل د دوسیو لپاره کمېټه تشکیل شي.
پدې کمېټه کې، به د کورنیوچارو او د اطلاعات و فرهنګ وزارتونو، د لویې څارنوالۍ، د ملي امنیت د ریاست او د افغانستان د رسنیو او خبریالانو د فدراسیون مسوولین، ګډون ولري.
د تېرې ورځې په ناسته کې، د کابینې د عدلي او قضایي کمېټې رییس او د ولسمشر دویم مرستیال محمد سرور دانش، په عدلي او قضایي بنسټو نو یې نیوکه وکړه، چې دوی په تېرو کلونو کې ندي توانیدلي، چې د خبریالانو پروړاندې د تاوترریخوالي او قتل قضیې یوې نتیجې ته ورسوي. ښاغلي دانش دې ته په اشاره، چې لدې قضیو څخه تنها دوه سلنه قضیې څېړل شوي دي وویل: هغه کمېټه چې اوس تشکیل کېږي، باید په اوله مرحله کې د خبریالانو پروړاندې د تاوتریخوالي او د قتل ټول موارد بررسي کړي او د دغه بررسي راپور بیا د کابینې عدلي او قضایي کمېټې ته وړاندې کړي، ترڅو د هغه د څېړلو لپاره نور ګامونه پورته شي.
د تېرې ورځې په ناسته کې، د اطلاعات و فرهنګ وزارت نشراتي مرستیالې مژګان مصطفوي، هغه راپور چې د ژورنالیستانو د ملي اتحادیي او نی په همکارۍ جوړ شوی وو، وړاندې کړ، چې په هغه کې په تېرو پنځلسو کلونو کې له ۶۲۵ د تاوتریخوالي او ۵۹ د خبریالانو د قتل له مواردو څخه یادونه شوې وه.
په هغه راپور کې، چې د لویې څارنوالۍ د سرپرست له لوري وړاندې شو، دې ډول قضیو ته د رسېدنې تنها ۱۲ موارده موجود وو، چې له هغې جملې څخه یې نیمایي قضیې نتیجې ته ندي رسېدلې.
د افغانستان د ژورنالیستانو د ملي اتحادیې او د نی مسوولین، چې پدې ناسته کې یې ګډون درلود، دې ته په اشارې چې په تېرو کلونو کې یې هم څو وارې د دغه دوسیو د څېړلو غوښتنه کړې وه، آمادګې یې وښودله چې د نوې کمېټې سره به هراړخیزه همکاري کوي، ترڅو د نظر وړ دوسیې نتیجې ته ورسیږي.
د افغانستنان د ژورنالیستانو د ملي اتحادیې اجرایوي رییس، فهیم دشتي وویل: د لویې څارنوالۍ په راپور کې معلومیږي، مثال چې له ۱۳۸۸ کال څخه راپدې خوا تنها یو مورد د کشف په مرحله کې دی، او یاهم له قانوني دلیل پرته یوه دوسیه د بررسي کولو له دایرې څخه وتلې ده. دا په ډاګه کوي، چې تراوسه پورې د دغه دوسیو د څېړلو لپاره کومې ادارې شتون نه درلود او همدغه حالت د خبریالانو او رسنیزو فعالینو ترمنځ د شدیدي ناخوښۍ سبب شوی دی.
د نی د دفتر رییس، عبدالمجیب خلوتګر هم د ژورنالیستانو پر وړاندې د تاوتریخوالي د پېښو د شمېر په وړاندې کولو وویل، چې عدلي او قضایي بنسټونه او همدارنګه پولیسو دغه قضیو ته د رسېدنې لپاره خپلې وظیفې نه دې ترسره کړې او نوې تشکیل شوې کمېټه کولای شي چې دغه دوسیو ته د رسېدنې لپاره لاره هواره کړي.
د ولسمشر د حقوقي مشاورینو د بورډ د غړي، نصرالله ستانکزي د وړاندیز پر بنسټ، نږدې ده چې دا دوسیې په لومړي ګام کې په دریو کټګوریو( هغه دوسیې چې د محکمو تر بررسي کولو لاندې دي، هغه دوسیې چې د څارنوالۍ له لوري د تحقیق په مرحله کې دي او هغه دوسیې چې تراوسه د کشف تر مرحلې لاندي دي) ووېشل شي او وروسته د مربوطه بنسټونو له لوري ورته رسېدنه وشي.
د سترې محکمې غړي، عبدالقادر عدالتخوا، چې پدې ناسته کې یې ګډون درلود د چمتوالي اعلام یې وکړ، چې محکمو ته د قضیو د راجع کولو په صورت کې به ډېر ژر د هغو څېړل پيل کیږي.
نږدې ده، چې راتلونکې اونۍ د خبریالانو پر وړاندې د تاوتریخوالي او قتل دوسیو ته د رسېدنې کمېټه په رسمي په کار پیل وکړي.
