په هغه ناسته کې، چې نن د اطلاعات او فرهنګ وزارت د نشراتي مرستیال، د ولسمشر د دویم مرستیال، د خبریالانو د صنفي او مرسته کوونکو بنسټونو د فدراسیون د مسوولینو او د رسنیو د مسوولینو په ګډون جوړه شوې وه، د خبریالانو د قتل دوسیو د تعقیب کولو په څرنګه والي تفاهم وشو.
په تېرو پنځلسو کلونو کې، په افغانستان کې نږدې ۶۰ تنو خبریالانو خپل ځاونه له لاسه ورکړي دي، چې لدې جملې څخه نږدې ۴۰ تنه په قتل رسېدلي دي مګر د دغه قتلونو دوسیې بې نتیجې پاتې دي او تراوسه پورې د دغه قتلونوعاملین ندي پېژندل شوي او نه هم د قانون منګولو ته سپارل شوي دي.
د افغانستان د ژورنالیستانو او رسنیو د بنسټونو د فدراسیون له لوري د ولسمشرۍ له ریاست څخه د دغه دوسیو د تعقیب کولو له غوښتنې وروسته، ولسمشر د یوه فرمان په لړ کې چې په هغه کې د خبریالانو د خوندیتوب په اړه هم راغلي وو، عدلي او قضایي ادارو ته یې دنده ورکړه، ترڅو دا دوسیې تعقیب کړل شي.
له هغې وروسته، کله چې د افغانستان د ژورنالیستانو او رسنیو د بنسټونو د فدراسیون د رهبرۍ شورا یو شمېر غړو او د یو شمېر رسنیو مسوولینو د ولسمشر له دویم مرستیال، سروردانش سره ناستې درلودلې، پدې اړه یې هم بحثونه کړي دي.
د ذکر شوي فرمان او د ولسمشر له دویم مرستیال سره د خبرو اترو پر بنسټ، نږدې ده، چې د خبریالانو د قتل د دوسیو تعقیب کول پیل شي. په لومړي قدم کې د دغه دوسیو په اړه فدراسیون د اطلاعات و فرهګ وزارت د نشراتي معینیت په همکارۍ یو راپور چمتو کړی او په هغه ناسته کې، چې د ولسمشرۍ د دویم مرستیال او د لویې څارنوالۍ د چارواکو په ګډون به په راتلونکې کې جوړه شي، له هغوی سره شریک کړي.
فدراسیون به همدارنګه د اطلاعات و کلتور وزارت په همکارۍ به د دغه دوسیو د نتیجې ته د رسولو لپاره نور ګامونه هم تعقیب کړي.
د نن ورځې په ناسته کې، په هغو نورو مواردو هم بحث وشو کوم چې خبریالان، رسنۍ او رسنیز کارکوونکو ترې اندېښنه ښکاره کوي او پرېکړه وشوه چې فدراسیون به د حکومت په همکارۍ د دغه اندېښنو د حل لپاره یوه مناسبه لار پیدا کړي.
