د هرات والي او امنیتي چارواکو د آمادګۍ اعلام کړی، تر څو د دغه ولایت د خبریالانو د امنیت د ټینګښت لپاره کمېټه جوړه کړي.
د هرات والي، د ملي امنیت رییس، د پولیسو قومندان او د هېواد په لویدیځ زون کې د ملي اردو د قومندانۍ استازي د هرات ولایت د کنفرانسونو په سالون کې د خبریالۍ د بنسټو د مسوولینو او د هرات له یو شمېر خبریالانو سره یوه فوق العاده ناسته ترسره کړه.
د هرات والي، محمد آصف رحیمي پدې ناسته کې ټینګار وګړ، چې په ټول چمتووالي سره به د رسنیو له ټولنې او خبریالانو څخه ملاتړ کوي، د خبریالانو د خوندیتوب پخاطر د ولسمشر د وروستي فرمان د تطبیق لپاره به جدي هڅې ترسره کوي.
په هرات کې د افغانستان د ژورنالیستانو د ملي اتحادیې مسوول، قدیر شاهین چې پدې ناسته کې يې ګډون درلود وایي: یاده ناسته په هرات کې د افغانستان د ژورنالیستانو د ملي اتحادیي د ولایتي دفتر په وړاندیز سره جوړه شوه او په آخر کې پرېکړه وشوه، چې د امنیتي بنسټونو، د ولایت مقام او د رسنیزو بسټونو څخه تشکیل شوې یوه لنډمهاله اوه کسیزه کمېټه د رسنیو او خبریالانو د امنیت د ټینګښت د کمېټې د څرنګه تشکیل، هدفونو، داخلي کړنلاره او د دوی مسوولیتونه، یوه طرحه ترتیب کړې او په راتلونکې ناسته کې به د کمېټې په جوړولو عملي اقدام ترسره کیږي.
پدې ناسته کې یو شمېر خبریالانو او رسنیزو مسوولینو هم پدې اړه د ولسمشر له فرمان په هرکلي او د خبریالانو د امنیت ساتنې د کمېټې له جوړېدلو د خبریالانو او رسنیو د څرنګه امنیت ټینګښت، دولتي اطلاعاتو ته په اسانیا سره د څرنګه لاسرسي او د خبریالانو د ظرفیت د کچې لوړولو لپاره د پروګرامونو د جوړولو پخاطر د هرات د سیمه ایزې اداري له ملاتړ خبرې وکړې.
د هرات ولایت مسوولینو د مطره شوو وړاندیزونو په هرکلي سره، ژمنه وکړه، چې د هرات سیمه ایزه اداره د خبریالانو د امنیت د ټینګښت او د رسنیو د آزاد فعالیت پخاطر به خپل مکلفیتونه په دقت سره ترسره کړي.
نږدې ده، چې په راتلونکو ورځو کې د امنیت د ټینګښت کمېټې رسمي جوړېدنه او د دغه کمېټې نوم اېښودنه د هرات د امنیتي مسوولینو او خبریالانو په حضور دې ته ورته ناسته ترسره شي.
