په بغلان ولایت کې د ادیب رادیو خبریال، محمد ابراهیم هاشمي، تېره شپه ،کله چې له خپل ورور محمد موسی سره له دفتر څخه د کور په لور روان وو، په لاره کې تر یوه وسلوال برید لاندې راغی او سخت ټپي شو.
د محمد ابراهیم هاشمي د ورور، محمد موسی هاشمي په وینا، د بغلان په مرکز د پلخمري ښار په لومړۍ ناحیه کې کورته نږدې وسلوالو کسانو هغوی درولي دي او د محمد ابراهیم په سر باندې یې ډزې کړي دي، موسی هاشمې هم د برید کوونکو له لوري وهل شوی دی.
د هاشمي روغتیایي حالت ښه ندی او دې ته ضرورت دی، چې په کابل او یا هم په همسایه ملکونو کې تداوي شي.
د بغلان ولایت امنیتي مسوولین وايي، چې د دغه قضیې په اړه یې پلټنې پیل کړې دي. د دوی په وینا لږترلږه د دغه پېښې یو تورن کس نیول شوی دی.
د بفلان د پولیسو قومندانۍ ویاند ذبیح شجاعي ویلي دي: نیول شوی کس په هاشمي باندې د برید اصلي کس دی او هڅه کوو چې نور همکاران یې هم وپېژنو او ونیسو.
د ادیب رادیو مالک، حبیب الرحمن شېرزی هم تایید کړې، چې د قضیې اصلي کس د پولیسو له لوري نیول شوی دی.
