د ننګرهار ولایت د ملي رادیو تلویزون د نشراتو رییس، محمد ذبیر خاکسار، تېره شپه د وسلوالو کسانو تر برید لاندې راغلی او په شهادت رسېدلی دی.
خاکسار، چې نږدې شل کاله یې د ملي تلویزون په مختلفو څانګو کې کار کړی وو، پدې وروستیو کې د ننګرهار د والي د فرهنګي مشاور په حیث ټاکل شوی وو.
خاکسار تر لسان دورې پورې خپلې زده کړې د ادبیاتو په څانګه کې پای ته رسولې وې، او په ملي تلویزون کې د کار ترڅنګ یې له نورو رسنیو سره هم همکاري درلوده، د آرمان د ملي ورځپاڼې د مسوولینو په وینا، خاکسار له دیارلس کلونو راپدې خوا د آرمان له ورځپاڼې سره په وړیا ډول همکاري درلوده.
همدارنګه خاکسار د کابل په ملي تلویزون کې ادبي او طنزي خپرونې طرح او اجرا کولې.
د ښاغلي خاکسار یوه تن همکار، چې نه یې غوښتل نوم یې په ډاګه شي ویلي دي، چې خاکسار پدې وروستیو کې په ننګرهار کې د داعش ترهګریزې ډلې له لوري ګواښونه ترلاسه کړي وو.
د ننګرهار امنیتي مسوولین وایي، چې تراوسه د بریدکوونکو هویت ندی په ډاګه شوی او هغوی پدې اړه پلټنه پیل کړې ده.
په همدې حال د خبریالانو د صنفي بنسټونو مسوولین وایي، چې د دغه قضیو د پلټولو په اړه د دولتي بنسټونو ژمنې د باور وړ ندي.
د افغانستان د ژورنالیستانو د ملي اتحادیې اجرایوي رییس، فهیم دشتي وايي: دا مبالغه نده که چېرته ووایم، چې په تېرو کلونو کې په سلګونو ځلو په خبریالانو او رسنیزو کارکوونکو برید شوی دی، مګر لدې جملې څخه شاید د یوه لاس د ګوتو په شمېر قضیې هم د پولیسو د تحقیقاتو له اثره به روښانه شوې نه وي.
د دشتي په وینا، د رسنیو او خبریالانو صنفي او مرسته کوونکي بنسټونه به ډېر ژر د کورنیو چارو او دفاع له وزیرانو او د ملي امنیت له رییس سره ناستې ولري، ترڅو په ریښیي ډول له دغه ستونزو سره چلند وکړل شي.
