د ټولیزو رسنیو د تاسیس او فعالیت د طرز او ډول مقرره، چې د رسنیزو کارکوونکو اصلي حقونه او امتیازونه په ځانګړې توګه د دوی ځاني او وظیفوي خوندیتوب تضمین کوي، نافذه شوه، او لدې ورسته په په جدي ډول عملي شي.
د نن ورځې په خبري ناسته کې، چې د افغانستان د ژورنالیستانو د ملي اتحادیې د مسوولینو، د افغان خبریالانو د خوندیتوب د کمېټې د مسوولینو او د اطلاعات و فرهنګ د نشراتي مرستیال په ګډون د افغانستان د رسنیو به مرکز کې جوړه شوې وه، د دغه مقررې په اړه بشپر توضیحات وړاندې شول.
پدې مقرره کې، د رسنۍ د کارکوونکو د تړونونو د تنظیم، د بیمې حقونو، د ټپي کېدلو، شهید کېدلو، معلولیت او معیوبت په وخت کې د امتیازونو چې باید ورکړل شي، د تقاعد حقونو، اضافه کاري او پدې اړه د نورو مواردو واضع حکمونه شتون لري.
وړاندې لدې او د یوه قانوني لاسوند په نشتون کې، د رسنیو مالکانو به د خپلو کارکوونکو اکثره حقونه او امتیازونه تر پښو لاندې کول، د کار ظالمانه تړونونه به یې پر هغوی باندې تحمیل کول او په هغه صورت کې چې کارکوونکو ته به یې ځاني زیان رسېده هېڅکله به یې د دوی پروړاندې ځان مسوول نه باله، بله ستونزه دا وه چې د رسنیو د کارکوونکو د حقونو او امتیازونو لپاره به هېڅ قانوني مجرا شتون نه درلود.
د خبریالانو صنفي او مرسته کوونکي بنسټونه له حکومت غواړي، چې په جدي ډول دغه مقرره تطبیق کړي او رسنیزو کارکوونکو ته اعلام کوي، چې د خپلو آمیرینو د غیر قانوني چلند څخه د شکایت لرلو په صورت کې، کولای شي چې دغه بنسټونو ته مراجعه وکړي.
