نن ماښام یوه ځانمرګي بریدګر د (موبي ګروپ) د کارکوونکو د لېږد د یوه بس موټر تر څنګ خپل د چاودیدونکو موادو ډک موټر ته چاودنه ورکړه.
د لومړیو راپورونو پر بنسټ، پدې برید کې شپږو کسانو خپل ځانونه له لاسه ورکړي دي او نږدې پنځه ویشت کسان ټپي شوي دي.
د موبي رسنیز ګروپ، چې د طلوع او لمر تلویزونونه، د آرمان او اراکوزیان رادیوګانې، د(افغان سین) مجله او د( کابورا پرودکشن) رسنیز شرکت په واک کې لري، لدې وړاندې په تکرار سره د ترهګریزو ډلو د تهدید لاندې وو.
په وروستۍ پېښه کې، د کندز ولایت له پېښو وروسته د سږ کال اوړی وو، چې طلوع او یک تلویزونونه د طالبانو د نظامي شورا له لوري د نظامي موخو په توګه اعلام او په برید باندې وګواښل شول.
لدې وړاندې هم ترهګیزو ډلو، یو شمېر خبریالان او رسنۍ د خپلو بریدونو موخې ګرځولي وو، مګر د نن ورځې برید په خپل رقم کې یو بې ساری برید وو.
د افغانستان د ژورنالیستانو ملي اتحادیې، په هغه اعلامیه کې، چې د رسنیو په کارکوونکو د نن ورځې ځانمرګي برید په تړاو یې خپره کړې، دې ته په ټینګار چې د خبریالانو او رسنیزو کارکوونکو شهید او ټپي کېدل په هېواد کې د بیان آزادۍ لپاره لویه ضایع بللې ویلي یې دي، چې د افغانستان رسنیز فعالان به د خبر رسونې په لاره کې خپل مسوولیت ته همداسې ادامه ورکوي.
