نن ماښام، وسلوالو کسانو د چکاد شخصي تلویزون خبریال او د ښاروال ټولنیزې خپرونې وړاندې کوونکی سلیم مقیمي، د هرات ښار په پنځلسمه ناحیه کې ټپي کړ.
سلیم مقیمي چې پر مټ باندې ټپي شوی دی، په هرات کې یې د افغانستان د ژورنالیستانو د ملي اتحادیې استازي ته ویلي دي، کله چې پر موټر سایکل باندې سپور او کور ته د تلو قصد یې درلود په لاره کې د څو وسلوالو کسانو له لوري، چې په سړو او ګرمو وسلو سمبال وو درول شوی او برید کوونکي ورسره نيښته کړيده.
د مقیمي په وینا، برید کوونکو د چاکو په واسطه په نوموړي برید کړی او پر مټ باندې یې ټپي کړی دی.
مقیمي ویلي دي: په زیاتو هڅو سره وتوانیدلم چې د وسلوالو له منګولو تېښته وکړم او خپل ځان د پانسمان پخاطر یوه درملتون ته ورسوم.
د ښاغلي مقیمي روغتیایي حالت ښه دی.
د هرات امنیتي مسوولینو په هغه ولایت کې د افغانستان د ژورنالیستانو د ملي اتحادیې په استازیتوب ویلي دي، چې د قضیې د عاملینو د پېژندنې پخاطر به پېښه تعقیب کړي.
