په هرات ولایت کې د آسیا سیمه ایز تلویزون خاوند امان الله عطایي، تېره شپه په کابل کې ووژل شو، دا پېښه د کابل د آتمې امنیتي حوزې په سیمه کې رامنځته شوېده.
د کابل د پولیسو مسوولینو ویلي دي، چې د ښاغلي عطایي د وژلو په تړاو یې دوه تنه نیولي دي.
په ظاهره کې، نیول شوي کسان د ښاغلي عطایي له خپلوانو څخه دي.
په همدې حال او په تېرو اونیو کې په رسنیزو فعالانو بریدونو ته په کتو، د دغه ډول کسانو د له منځه وړلو لپاره د دوامداره هڅو اندېښې زیاتې شوېدي.
په تېرو دوو اونیو کې، لږترلږه په دوو مواردو کې، د بخدي آژانس د امتیاز خاوند سالم وحدت او لیکوال او شنونکی احمد سعیدي په کابل کې تر برید لاندې راغلل.
د افغانستان د ژورنالیستانو ملي اتحادیې اعلام کړي دی، چې د دغه پيښو په تړاو له امنیتي بنسټونو سره په اړیکه کې شوی دي او د رسنیزو فعالانو د امنیت لپاره یې د زیاتې پاملرنې غوښتنه کړې ده.
