د څارنوالۍ له لوري د هشت صبح ورځپاڼې د مسوول مدیر له احضار وروسته، د اطلاعات و فرهنګ وزارت نشراتي مرستیال د څارنوالي چلند د هېواد د قوانینو خلاف بللی دی.
د هشت صبح ورځپاڼې مسوول مدیر د هغه مطلبنو له خپرولو وروسته، چې په هغه د یو شمېر دولتي ادارو له فساد څخه یې پرده پورته کړې وه، درې ورځې وړاندې د څارنوالۍ له لوري احضار شو.
د څارنوالۍ دا چلند د خبریالانو او رسنیو د صنفي او مرسته کوونکو بنسټونو له غبرګون سره مخ شو.
د افغانستان د ژورنالیستانو ملي اتحادیې، د څـارنوالۍ پدې چلند انتقاد وکړ او هغه یې د هېواد د نافذه قوانینو خلاف وباله.
د اطلاعات و فرهنګ وزارت هم، دغه چلند د قانون خلاف بللی دی.
تېره ورځ د اطلاعات و فرهنګ وزارت نشراتي معیینې، سیده مژګان مصطفوي رسنیو ته وویل: د ټولیزو رسنیو د قانون په تکیه، رسنیزو تخلفاتو او شکایتونو ته د رسېدلو پخاطر د رسنیزو مخالفتونو د بررسي کمیسیون جوړ شوی دی.
د اطلاعات و فرهنګ وزارت نشراتي معیینې، همدارنګ ویلی دي، چې د عدلي او قضايي ارګانونو له لارې د خبریالانو او رسنیزو کسانو احضار او جلب کول، د ټولیزو رسنیو د قانون خلاف دي.
د رسنیزو شکایتونو او مخالفتونو د بررسي کولو کمیسیون، د ټولیزو رسنیو په قانون کې له تازه تعدیلاتو وروسته، یوه میاشت وړاندې د بشر حقونو د خپلواک کمیسیون د با صلاحیته استازي په غړیتوب، د مدني ټولنې د دوه استازو، د ژورنالیستانو له اتحادیو څخه د دوه استازو، د یوه حقوق پوه، د افغانستان د سینما ګرانو د اتحادیې استازي، د کابل پوهنتون د ژورنالیزم د رییس، د افغانستان د علماوو له شورا څخه د یوه عالم او د اطلاعات و فرهنګ وزارت د استازي په ګډون جوړ شو، او رسنیزو تخلفاتو ته د رسېدلو مسوولیت په غاړه لري.
