تېره شپه، نا معلومو وسلوالو کسانو د بخدي خبري آژانس د امتیاز په خاوند، سالم وحدت باندې د کور په مخ کې ډزې وکړې، مګر نوموړي ته زیان ونه رسېده.
د ښاغلي وحدت په وینا، په دې پېښه کې یې د مېرمنې ورور، ډېر سخت ټپي شوی دی او د کابل په یوه روغتون کې بستر دی.
د کابل د پولیسو چارواکو دغه پېښه تایید کړې، مګر دوی وایي، چې تراوسه د بریدګرو او د دغه برید په اړه کوم اطلاعات نه لري، د پولیسو چارواکي ټینګار کوي چې پدې اړه یې پلټنې روانې دي.
د افغانستان د ژورنالیستانو ملي اتحادیې پدې برید اندېښنه ښودلې او له امنیتي بنسټونو یې غوښتي، چې پدې اړه د جدي پلټنو ترڅنګ د خبریالانو او په ځانګړې توګه د ښاغلي سالم وحدت د خوندیتوب ټینګښت ته جدي پاملرنه وکړي. سالم وحدت په ورته وخت کې د بهرنیو چارو وزارت د آرشیف د څانګې رییس هم دی.
