نن سهار وسلوالو کسانو، په کندهار کې دکابل نیوز تلویزیون سیمه ییز خبریال عبدالمنان ارغند په ډزو سره شهید کړ.
یاده پېښه د کندهار ښار په نهمه ناحیه او پداسې وخت کې رامنځته شوه، چې خدای بښلی ارغند له کور څخه د خپل کار د دفتر په لور روان وو.
په کندهار کې د ژورنالیستانو د ملي اتحادیې د ولایتي دفتر مسوول، صدیق خلیق وایي: د هغه اطلاعاتو پر بنسټ چې تراوسه موږ ته رارسېدلي دي، دولتي سرچینو د دغه قضیې څېړنه پیل کړېده، مګر تراوسه د دغه قضیې له عاملنو څخه کومه نښه لاسته نده راوړل شوې.
په کابل او کندهار کې د خبریالانو صنفي او مرسته کوونکو بنسټونو په خپره شوې اعلامیه کې له حکومت څخه د دغه قضیې د جدي څېړنې او محکمې ته د هغوی د کش کولو غوښتنه کړې.
په کابل کې د افغانستان د ژورنالیستانو د ملي اتحادیې مسوولین وایي، چې د قضیې جزیات یې د ولسمشر د دویم مرستیال له دفتر، چې د حکومت او رسنیو د ګډې کمېټې مشري په غاړه لري، شریک کړي او د کورنیوچارو وزارت او د ملي امنیت له ریاست سره په همکارۍ تعقیب کیږي.
