د پرون ورځې له ځانمرګي برید وروسته، چې په کابل کې د (شش درک) په سیمه کې ترسره شو او په هغه کې نهه تنو خبریالانو او رسنیزو کارکوونکو خپل ژوند له لاسه ورکړ او یو شمېر ټپي شول.
په غور کې نن په یوه ناسته کې خبریالان د دغه قضیې د څېړلو غوښتونکي شول. یادو خبریالانو چې حکومت یې د خلکو او په ځانګړې توګه د خبریالانو د امنیت په خوندي کولو کې په ناتوانۍ تورن کاوه، همدارنګه یې له نړیوالو بنسټونو وغوښتل ترڅو په دغه قضیه څېړنه وکړي.
په غور ولایت کې د افغانستان د ژورنالیستانو د ملي اتحادیې د ولایتي دفتر مسوول، عبدالقدیر غفوري د دغه وحشي برید د غندنې ترڅنګ له ملي بنسټونو غواړي ترڅو پدې قضیه څېړنه وکړي او د موضوع د روښانه کولو لپاره د افغانستان د مطبوعاتو له کورنۍ سره همکاري وکړي.
د ښاغلي غفوري په وینا، د افغانستان حکومت د خبریالانو امنیت او خوندیتوب ته پاملرنه نده کړې او هېڅکله هم د خبریالانو د تاوتریخوالي او قتل د عاملینو په پېژندلو او نیولو ندي توانېدلي.
په غور کې د خبریالانو د خوندیتوب د کمېټې مسوول، غلام رباني هدفمند د تېرې ورځې برید یو سازمان شوی عمل ګڼلی او د هغه د جدي څېړنې غوښتنه یې کړې ده.
یو شمېر نورو خبریالانو هم ټینګار کاوه، چې دا رنګه بریدونه نشي کولای چې د هغوی د رسنیزو فعالیتونو مخه ونیسي، بلکي هغوی به د تېر پشان خپلو فعالیتونو ته دوام ورکړي.
دا پداسې حال کې ده، چې وروستیو ناامنیو ۱۱ تنه خبریالان او رسنیز کارکوونکي قرباني کړل.
