د روان کال د لړم د میاشتې په ۱۵ مه نېټه، یو دیني عالم او په غزني کې د سعادت رادیو د امتیاز څښتن، مولوي غلام جیلاني عرفاني، په خپل موټر کې د مقناطیسي بم د چاودنې له امله ووژل شو.
دا پېښه پداسې حال کې رامنځته شوه، چې ښاغلی جیلاني له خپل کور څخه د وتلو په حال کې او د خپل کار د دفتر په لور په حرکت کې وو. په دغه چاودنه کې د عرفاني د وژل کېدلو ترڅنګ د نوموړي یو زوی او یوه لور هم ټپي شوي دي.
ښاغلی جیلاني که څه هم د دین عالم هم وو. په غزني ولایت کې یې د سعادت سیمه ییزې رادیو مسوولیت په غاړه درلود. یادې رادیو تل دیني مسال خپرول، او د سیمې د خلکو په منځ کې یې زیات آوریدونکي لرل. یاده رادیو نږدې شپږ کاله وړاندې د مولوي غلام جیلاني له لوري په دغه ولایت کې فعاله شوې وه.
د مولوي غلام جیلاني د قتل مسوولیت، تراوسه چا په غاړه ندی اخیستی. د غزني د والي مرستیال، محمد علي احمدي د دغه خبر د تایید ترڅنګ زیاتوي: پدې اړه د کشفي ارګانونو هڅې روانې دي، ترڅو د ښاغلي جیلاني د قتل مسوولین ونیسي.
په ورته وخت کې، په غزني ولایت کې د افغانستان د ژورنالیستانو د ملي اتحادیې مسوول، اسدالله جلال زي د یوې فعالې رسنۍ د مسوول په وژل کېدلو اندېښنه ښودلې او له امنیتي ځواکونو څخه د دغه ولایت د خبریالانو د امنیت د ټینګښت غوښتونکی دی.
