د رسنیزو مالکانو، نن په یوه خبري ناسته کې د طالبانو له لوري د رسنیو د ګواښونو پر وړاندې خپل موقف اعلام کړ.
دوې ورځې مخکې په یوه فیسبوک پاڼه کې، چې طالبانو ته منصوبه ده، د طلوع او یک تلویزیونونو پر وړاندې جدې تهدیدونه خپاره شوي وو.
پدې پاڼه کې په خپره شوې اعلامیه کې، دواړې رسنۍ دښمنې او نظامي موخې خطاب شوې وې او ګواښل یې کړی وو، چې په دفترونو او کارکوونکو به یې بریدونه وکړل شي.
د نن ورځې په خبري ناسته کې، چې په لسګونو تنو د خبریالانو د صنفي او مرسته کوونکو بنسټونو مسوولینو او رسنیزو مدیرانو پکې ګدون درلود، د طالبانو اخطار د افغانستان د ټولو رسنیو او ژورنالیستانو پر وړاندې تاوتریخوالی بلل شوی او اعلام شوی چې د دغه ګواښونو د دوام په صورت کې به رسنۍ د طالبانو د خبرونو په نه خپرولو لاس پوري کړي.
په هغه اعلامیه کې، چې د نن ورځې په ناسته کې خپره شوې ده، له دولت او د ملي او نړیوالو بنسټونو څخه غوښتنه شوې، ترڅو د افغانستان د خبریالانو او رسنیو په ملاتړ لاس پوري کړي.
په اعلامیه کې همدارنګه راغلي دي، چې د افغانستان رسنۍ او خبریالان د دغه ډول تاوتریخوالي او ګواښونو پروړاندې به سر ټیټ نه کړي او په حرفه وي معیارونو سره د خبر رسونې په لار کې به خپل مسوولیت ادا کوي.
