د کلید او صفا رادیوګانو مسوولین وایي، چې تېره شپه په جلال آباد ښار کې د دغه دوو رادیوګانو په دفترونه د بمونو پواسطه برید شوی.
کلید رادیو له پېژندل شوو او د ډېر آوریدونکو درلودونکو رادیوګانو څخه ده، چې په ۱۷ ولایاتو کې خپرونې لري او د صفا رادیو د ننګرهار ولایت له سیمه ایزو رادیوګانو څخه شمېرل کیږي.
د کلید رادیویي شبکې عمومي مدیره، نجیبه ایوبي وایي، چې له دې وړاندې د داعش له آدرس څخه ځینو خلکو د کلید رادیو د دولتي دفترونو مسوولین په ترهګریز برید ګواښلي وو.
نوموړې وایي: زموږ همکارانو په وروستیو اونیو کې تلیفوني اړیکې ترلاسه کړې وې، چې له هغوی څخه به غوښتل کېدل ترڅو د داعش ډلې د فعالیتونو د مربوطه خبرونو په خپرولو لاس پورې کړي، مګر د دوی انکار سبب شو، چې ګواښونه رامنځته شي او بالاخره پرونۍ پېښه رامنځته شوه.
د آغلې ایوبي په وینا، وروسته لدې پېښې پداسې حال کې چې د ننګرهار ولایت د جنایي او ملي امنیت د ریاست مسوولین د کلید رادیو په دفتر کې موجود وو، یو ځل بیا د داعش له آدرس څخه د کلید رادیو د ولایتي دفتر مسوول ته زنګ راغلي او ورته ویل شوي، چې دا د کار پیل دی او که بیا مو هم د داعش ډلې مربوطه خبرونو په خپرولو لاس پورې نکړ نو د دغه رادیو په دفتر او کارکوونکو به بریدونه ترسره شي.
په عین حال کې د صفا رادیو مسوول، فردوس حضرتي وایي، چې هغوی له دې وړاندې هېڅ ګواښ نه وو ترلاسه کړی او په خپل دفتر یې د دارنګه برید تمه نه درلوده.
د تېرې ورځې بریدونه، د دغه دوو رادیوګانو دفترونو ته هم زیانونه اړولي، مګر ځاني زیانونه یې نه درلودل.
د افغانستان د ژورنالیستانو ملي اتحادیې اعلام کړی دی، چې هڅه کیږي ترڅو د دغه رسنیو امنیت له هرڅه وړاندې ونیول شي. د یادې اتحادیې مسوولین وایي، چې له امنیتي بنسټونو سره به په اړیکه کې شي ترڅو د دغه رسنیو د امنیت لپاره امنیتي تدابیر ونیول شي.
