له کندز څخه د یو زیات شمېر خبریالانو او رسنیزو فعالانو له وتو سره په عین وخت کې، د یاد ولایت سیمه ییزو رسنیو ته د آوښتو زیانونو په اړه نوی خبر لاسته راغلي دي.
په تېرو دوو ورځو کې د کندز یو زیات شمېر خبریالان د نېښتو د ادامې او د دوی د استوګنې په سیمو د طالبانو د کنترول په دلیل یې هغه ولایت پراېښی او همدارنګه کابل، بلخ او تخار ولایتونو ته رسېدلي دي. دغه خبریالانو، چې اکثرو یې د کندز له سیمه ییزو رسنیو سره کار کاوه، د خپلو رسنیو د حالت په اړه تازه خبرونه له ځان سره لري.
د دغه خبرونو پر بنسټ، د زهره او چراغ محلي رادیوګانې، د خاور تلویزیون سیمه ییزه څانګه، رسنیزه ورځپاڼه او د الهدا اونیزه، چې په کندز کې یې فعالیت درلود، سخت زیانونه ورته آوښتي دي.
د زهره رادیو مدیره، آغلې ملالۍ یوسفي وایي: کندز ته د طالبانو د ننوتلو په دویمه ورځ، هغوی د زهره رادیو پر ودانۍ برید کړی.
د آغلې یوسفي په وینا، طالبانو د دغه رادیو ټول وسایل او تجهیزات تخریب کړي او یا یې هم له ځانه سره وړي دي.
د چراغ رادیو مدیره، آغلې ناجیه خدایار هم همداسې کیسه لري، نوموړې وایی: د طالبانو برید د دې سبب شو، ترڅو ټول تجهیزات او وسایل چې د څو کلونو په لړ کې مو چراغ رادیو ته برابر کړي وو له مېنځه لاړ شي.
آغلې خدایار زیاتوي: زموږ د رادیو ودانۍ ته هم سخت زیان اوښتی او یوه برخه تجهیزات مو لوټ شوي دي.
د خاور تلویزیون مسوول، شهباز صابر هم وایي، چې طالبانو د دغه تلویزیون پر ودانۍ برید کړی او د دغه تلویزون وسایلو د تخریب او لوټولو ترڅنګ(.................).
د ښاغلي صابر په وینا: آوښتي زیانونه دومره دي، چې حتا د کندز د امنیت د ټینګښت په صورت کې به د موږ د تلویزیون دویم ځل فعال کول ډېر سخت کار وي.
د الهدا اونیزې او رسنیزې ورځپاڼې مسوولین، هم دفترونو او تجهیزاتو ته د جدي زیانونو له آوښتو څخه خبر ورکوي.
د افغانستان د ژورنالیستانو ملي اتحادیه، چې د کندز د سیمه ییزو رسنیو له مسوولینو سره په نږدې اړیکو کې دي، اعلام کړی، د نورو مربوطه بنسټونو سره په همکارۍ به ډېر ژر دغه رسنیو ته د آوښتو زیانونو د کچې د معلومولو په اړه څېړنې پیل شي.
د یادې اتحادیې مسوولین وایي: رسنیو ته د آوښتو زیانونو په اړه چې موږ ته کوم شکایات رارسېدلي دي، دا په نښه کوي، چې د کندز سیمه ییزو رسنیو سخت زیانونه لیدلي او حتا دغه رسنو ته د هراړخېزې پاملرنې په صورت کې به ډېر وخت ونیول شي ترڅو دغه رسنۍ لومړي حالت ته راوګرزي.
له دې وړاندې د نورو رسنیو لکه: کیهان رادیو، شایسته رادیو، کندز رادیو، روشني رادیو تلویزیون او ملي رادیو تلویزیون د سوځېدلو او د وسایلو د تخریب په اړه خبرونه خپاره شوي وو.
