تېره ورځ د هغو ۹ تنو خبریالانو کورنۍ، چې په کابل کې د غوایي د لسمې نېټې په یوه ځانمرګي برید کې شهیدان شول او دوه تنه نور چې تېره اونۍ په خوست او کندهار ولایتونو کې شهیدان شول، له ولسمشر سره یې لیدنه وکړه.
پدې لیدنه کې، عطاالله حنانزي او میرویس خان د شهیدانو د کورنیو په استازیتوب خبرې وکړې او فهیم دشتي د افغانستان د ژورنالیستانو او رسنیزو بنسټونو د فدراسیون په استازیتوب د هغو هڅو په اړه چې په تېره یوه هفته کې یې د غوایي د لسمې نېټې د پېښې د یوولسو شهیدو شوو خبریالانو له کورنیو او له پنځو تنو ټپانو سره ترسره شوې وې، تشریح کړې.
دشتي د دې ترڅنګ، چې د وروستیو شهیدانو له کورنیو سره د دولت د عاجلو مرستو او همدارنګه د هغوی له کورنیو سره د ولسمشر له شخصي مرستو مننه وکړه، د افغانستان د ژورنالیستانو او رسنیزو بنسټونو د فدراسیون غوښتنې یې په لاندې شرحه ولسمشر ته وړاندې کړې:
ــ د یوه مکانیزم رامنځته کول، چې د هغو پر بنسټ د رسنیزو شهیدانو له کورنیو سره په دوامداره توګه مرستې ترسره کړل شي.
ــ د هغو خبریالانو د کورنیو رابلل، چې په تېرو ۱۷ کلونو کې په افغانستان کې په شهادت رسېدلي دي او د هفوي ستونزو ته د رسېدنې پخاطر له ولسمشر سره لیدنه.
ــ رسنیزو شهیدانو ته د ځمکې ورکول.
ــ د غوایي د لسمې نېټې د برید او په خوست کې پر احمدشاه او همدارنګه په کندهار کې پر عبدالمنان ارغند د بریدونو په هلکه د امنیتي بنسټونو د تحقیقونو د جزیاتو شریک کول.
دشتي همدارنګه د خیر کسانو د هغو مرستو چې د غوایي د لسمې پېښې د شهیدانو له کورنیو سره يې کړي دي یادونه کړې او له هغوی څخه یې مننه کړې ده او له ولسمشر څخه یې غوښتي، احمدشاه فیضي ته چې د غوایي د لسمې په پېښه کې ټپي شوی او وضعیت یې د اندېښنې وړ دی، جدي پاملرنه وکړدي.
ولسمشر غني د شهیدانو کورنیو ته د تسلیت ترڅنګ وعده وکړه، چې د رسنیزو شهیدانو له کورنیو سره د دوامداره مرستې د یوه مکانیزم تر جوړېدلو پورې به له شخصي پیسو څخه له دوی سره مرسته وکړي.
ولسمشر همدارنګه له خبریالانو څخه د ملاتړ د صندوق په ژر فعالولو ټینګار وکړ ویې ویل، چې دغه صندوق ته د مرستو د غونډولو لپاره یې د بهرنیو هېوادونو له سفیرانو سره خبرې کړې او کله چې د فدراسیون د استازو له لوري ورته معلومات وړکړل شي چې صندوق چمتو دی، ژمنه یې وکړه، چې بله اونۍ به د صندوق له رهبرۍ سره خبرې وکړي او صندوق ته به د مرستو عملي ټولول پیل کړي.
ولسمشر همدارنګه ژمنه وکړه، چې په کندهار کې د ارغند او په خوست کې د احمدشاه د قتل د قضیو د څېړنې امر ورکړي او پدې اړه به جزیات له رسنیو او د شهیدانو له کورنیو سره شریک کړل شي.
ولسمشر همدارنګه د خبریالانو د امنیت او خوندیتوب تامیین کولو د لارو د پیداکولو لپاره د کمیسیون او امنیتي ځواکونو د هڅو ستاینه وکړه او ژمنه یې وکړه چې پدې اړه به امنیتي ځواکونو ته ډېر دستورونه ورکړي.
