څه موده وړاندې په بادغیس ولایت کې یوې رسنۍ په یاد ولایت کې په سیمه ییزو بنسټونو کې اطلاعاتو ته د لاسرسي له نشتون څخه د افغانستان د ژورنالیستانو د ملي اتحادیې ولایتي دفتر ته شکایت کړي وو.
په بادغیس کې د افغانستان د ژورنالیستانو د ملي اتحادیې دفتر د دغه ستونزو د حل کولو په موخه د ولایت د مرستیال او په یاد ولایت کې د حکومت او رسنیو د ګډې کمېټې د رییس په ګډون ناسته په لار واچوله.
پدې ناسته کې، خبریالانو په یاد ولایت کې اطلاعاتو ته د لاسرسي په چارو کې د سیمه ییزو اداراتو د همکارۍ له نشتون څخه یادونه وکړه. په ورته وخت کې د حکومت او رسنیو له ګډې کمېټې څخه د دغه ستونزي د حل غوښتونکي شول.
د بادغیس ولایت مرستیال فیض محمد میرزاد او په دې ولایت کې د ګډې کمېټې رییس ژمنه وکړه، چې د ولایت په اداري جلسه کې به د دولتي اداراتو ټولو مسوولینو ته امر وکړي، چې له رسنیو او خبریالانو سره لازمه همکاري وکړي. نوموړي زیاته کړې، چې د بیان آزادي او خبریالانو ته د اطلاعاتو ورکول د حکومتي مسوولینو اساسي دنده ده او هغوی باید له خبریالانو څخه اطلاعات درېغ نکړي.
په همدې حال کې، په بادغیس کې د افغانستان د ژورنالیستانو د ملي اتحادیې د ولایتي دفتر استازي، ښاغلي نبي الله بینش رامنځته شوی حال اندېښمن بللی او د ولایت له دفتر او د ګډې کميټې له رییس څخه دغه ستونزې ته د عاجلې رسېدنې غوښتونکی شو.
د پېښو او خبرونو د دقیق پوښښ لپاره د سیمه ییزې ادارې په چوکاټ کې د عمومي اړیکو او مطبوعاتي واحدونو نشتون او د مرکز اطلاعاتي واحدونو ته د بادغیس د سیمه ییزو خبریالانو محدودیت، یو له هغو ننګونو څخه دي چې د دې ولایت خبریالان ورسره مخ دي.
