په کندز کې د طالبانو او امنیتي ځواکونو ترمنځ د شخړو له یوې زیاتې مودې وروسته، په هغه ولایت کې په رسنیو د طالبانو د بریدونو اندېښنوونکي خبرونه خپریږي.
د شایسته رادیو(د ښځو ځانګړې رادیو) او د کیهان رادیو( د ځوانانو ځانګړې رادیو) مسوولین وایي، چې طالبانو د دغه رسنیو پر ودانیو، چې دواړو په یوه ودانۍ کې فعالیت کاوه، برید کړی او د هغوی یې ټول سامانونه او تجهیزات تخریب کړي او یا یې هم له ځان سره وړي دي.
آغلې زرغونه حسن، چې د دغه رادیویي شبکې د امتیاز څښتنه ده وایي: طالبانو زموږ په استیدیوګانو برید ګړی، وسایل او تجهیزات یې لوټ او یا یې هم تخریب کړي دي.
د آغلې حسن په وینا، کومه سیمه چې دغه رادیوګانې پکې موقعت لري، تراوسه د طالبانو تر کنترول لاندې ده او د دغه شبکې کارکوونکي او مسوولین نشي کولای چې د آوښتو زیانونو کچه معلومه کړي.
آغلې زرغونه حسن، همدارنګه هغه ګواښونه چې د طالبانو له لوري یې ترلاسه کړي، داسې بیانوي: له لوی اختر څخه څه موده وړاندې وه، چې د امنیتي ځواکونو او خلکو ترمنځ د باور جوړولو د خپرونو په تړاو د طالبانو له لوري وګواښل شوم.
په تېرو ورځو کې هم د کندز په دولتي او خصوصي رسنیو د طالبانو د بریدونو په اړه خبرونه خپاره شوي وو.
د افغانستان د ژورنالیستانو ملي اتحادیه پداسې حال کې، چې تمه لري ترڅو په کندز کې د دولت کنترول په بیا رامنځته کولو سره په هغه ولایت کې د دولتي او خصوصي رسنیو د فعالیت زمینه برابره شي، اعلام کوي چې دا رسنۍ د خپل فعالیت د پیل کولو لپاره فوري مرستو ته ضرورت لري.
د افغانستان د ژورنالیستانو د ملي اتحادیې مسوولین وایي، چې ملي او نړیوال بنسټونه، له دقیقو څېړنو وروسته باید له دغو رسنیو سره مرستې وکړي.
