اطلاعاتو ته د لاسرسي د څار کمیسیون، نن په یوه خبري ناسته کې د شتون اعلام وکړ. یاد کمیسیون چې اطلاعاتو ته د لاسرسي د قانون د ۱۶ مې مادې پر بنسټ جوړ شوی دی، دیارلس غړي لري او د یو شمېر دولتي بنسټونو، مدني ټولنې، سیاسي خزبونو او د صنفي او حامي بنسټونو له استازو او خبریالانو څخه تشکیل شوی دی. په هغه اعلامیه کې، چې ددغه کمیسیون له لوري خپره شوېده دې ته په ټینګار سره، چې اطلاعاتو ته د لاسرسي نشتون یوه له هغو ستونزو څخه وه چې په تېرو کلونو کې موجوده وه، چې د یو شمېر دولتي ادارو په کړنو کې د شفافیت د نشتون یو عامل شمېرل کېده، راغلي دي: دغه کمیسیون مسوولیت لري، ترڅو اطلاعاتو ته د افغانستان د وګړو د لاسرسي زمینه د افغانستان د قوانیونو په چوکاټ کې وڅاري، د هېواد د وګړو لپاره اطلاعاتو ته د لاسرسي د قانون له حق څخه ګټه اخیستنه آسانه او برابره کړي، له ټولو دولتي ادارو سره په اړیکه کې وي او هغه شکایتونو ته چې د اطلاعاتو د غوښتونکو له لوري دغه کمیسیون ته راجع کېږي، رسېدنه وکړي او له دولتي ادارو سره په اړیکه کې دا یقیني کړي، چې هېڅ کومه دولتي اداره د هېواد د قوانینو خلاف، غوښتونکو ته د اطلاعاتو له وړاندې کولو څخه ډډه نه کوي.
د دغه کمیسیون مسوولین د حکومت د همکارۍ له نشتون څخه شکایت لري او وایي، د دغه کمیسیون له جوړېدلو څخه چې درې میاشتې تېریږي او پدې موده کې یو لړ فعالیتونه ترسره شوي چې لدې جملې څخه داخلي ټولټاکنې، د کمیسیون د فعالیت د کړنلارې برابرول، اطلاعاتو ته د لاسرسي د فورم او د دولتي ادارو د کارکووونکو د اطلاع رسونې د لارښود جوړېدل دي، خو تراوسه پورې د ضرورت وړ بودیجه او نورې اسانتیاوې چې دغه کمیسیون ورته اړتیا لري د حکومت له لوري ورته ندي برابرې شوې.
په همدې حال، دغه کمیسیون اعلام کړی دی، چې اطلاعاتو ته د لاسرسي د څار کمیسیون به لدې ورسته که چېرته په هېواد کې اطلاعاتو ته د لاسرسي په مربوطه برخو کې شکایت شتون ولري، هغې ته به جدي ډول رسېدنه وکړي.
د نن په ناسته کې، چې د حکومت د رسنیو په مرکز کې جوړه شوې وه، د کمیسیون مسوولینو د خبریالانو هغه پوښتنو ته ځوابونه وویل کومې چې اطلاعاتو ته د لاسرسي د ستونزو او د دغه ستونزو د حل لپاره د کمیسیون د برنامو په اړه مطرح شوې.
