د هرات ولایت له خبریالانو څخه یو خبریال، شاهپور صابر، چې تېره ورځ د جنایي پېښې له جریان څخه د یور راپور جوړولو پخاطر د پېښې ځای ته تللی وو، د پولیسو قومندان د امنیتي ساتونکو د تند چلند او د هرات د پولیسو د قومندان عبدالمجید روزي له توهین او تحقیرسره مخ او د څو ساعتونو لپاره ورڅخه د نوموړي د خبریالۍ وسایل هم اخیستل شوي وو.
شاهپور صابر وایي: له دغې پېښې یو ساعت وروسته له څو تنو خبریالانو سره د هرات د پولیسو قومندان دفتر ته تللي وو، چې یو ځل بیا د ښاغلي روزي له لفظي تاوتریخوالي سره مخ شوم.
په هرات کې د افغانستان د ژورنالیستانو د ملي اتحادیې د مسوول، قدیر شاهین په وینا، د دغه پېښې په تعقیب د هرات خبریالان او رسنیز بنسټونو، نن سه شنبه وروسته له غرمې د هرات له والي محمد آصف رحیمي سره ناسته ترسره کړې او د هرات د پولیسو د قومندان دا چلند یې غندلی دی.
پدې ناسته کې خبریالانو او د هرات رسنیز بنسټونو، د هرات د پولیسو د قومندان له لوري خبریال ته د سپک چلند د توزیع غوښتنه کړې او د خبریالانو پر وړاندې د دا ډول تاوتریخوالي د دوام په اندېښنو سره پدې اړه د اصلاحاتو د راوستلو غوښتنه کړې.
پدې ناسته کې، د هرات د رسنیزو بنسټونو مسوولانو د هرات د پولیسو د قومندان چلند، لفظي تاوتریخوالی او رسنیزې ټولنې ته سپکاوی ګڼلی دی او د ځینو خبریالانو او رسنیو پروړاندې د نوموړي په تېر عمل باندې نیوکه کړې.
د خبریالانو د صنفي بنسټونو له جملې څخه، په هرات کې د افغانستان د ژورنالیستانو ملي اتحادیې د هرات له والي څخه ځانګړي غوښتي، ترڅو یادې قضیې ته رسېدنه وکړي او د خبریالانو پر وړاندې د هرات د پولیسو د قومندان سپک چلند ارزیابي کړي.
د هرات والي ، محمد آحف رحیمي ژمنه کړې، چې دغه قضه به په جدي توګه تعقیب کړي او نتیجه به یې خبریالانو ته تشریح کړي او که چېرته د هرات د پولیسو قومندان پدې قضیه کې ملامت وي، باید د خبریالانو پروړاندې بښنه وغواړي.
