هغه ناسته چې په همدې موخه د لغمان ولايت د اطلاعاتو او فرهنګ په رياست کې جوړه شوې وه، د اطلاعاتو او فرهنګ رييس سربېره په کې د ملي راديو تلويزيون امر، ګڼ شمېر نورو ژورناليستانو او په لغمان کې د غږيزو او چاپي رسنيو استازو ګډون کړی و.
په پيل کې د اطلاعاتو او فرهنګ رياست د اطلاعاتو امر ګل احمد محبت له لوري هغه مکتوب ولوستل شو چې د افغانستان د ژورناليستانو د ملي اتحاديې د مرکزي دفتر له لوري د لغمان ولايت مقام ته په دغه ولايت کې د ژورناليستانو د ملې اتحادې د مسول د پيژندنې په موخه رالېږل شوی و.
په مکتوب عتيق الله قريشي په لغمان کې د ژورناليستانو د ملي اتحاديې د مسول په توګه معرفي شوی او نن رسماً د يادې ناستې په ترڅ کې ژورناليستانو ته معرفي او خپل فعاليتونه يې پيل کړل.
په ناسته کې د اطلاعاتو او فرهنګ رييس فيضان الله پټان په لغمان کې د ژورناليستانو د ملي اتحاديې د فعاليتونو د بيا پيل په اړه خوښي وښوده او تر څنګ يې د ژورناليستانو په همغږي او يوالي ټينګار وکړ، نوموړي په خپلو خبرو کې د همکارۍ ترڅنګ ډاډ ورکړ چې د سيمه يزو رسنيو او ژورناليستانو د تقويت لپاره کار کوي او د دوی ستونزې او غوښتنې به تر لوړپوړو ادارو رسوي.
د لغمان د ملي راديو تلويزيون امر محب الله محب د مبارکۍ ترڅنګ د ژورناليستانو په همغږۍ او يوالي ټينګار وکړ او ډاډ ور کړ چې د يادې اتحادې سره به تل همکار پاتې کېږي.
وروسته په وار سره د ژورناليستانو د دفاع کمېټې مسول شاولي نيازي، ليکوال او ژورناليست عزيزالدين يوسفزي، د کاوون غږ خپلواکې راديو د نشراتو مدير محمد ګلاب ابراهيمي، د خپلواکو ژورناليستانو د ټولنې منشي او خيبر نوښت راديو استازي رحمان الله رحماني، د پامير راديو استازي نسيم شفق او يو شمېر نورو په وار سره په خپلو خبرو کې په لغمان کې د ژورنالیستانو د ملي اتحاديې د څانګې پرانيستې باندې خوښي وښوده او د نوي معرفي شوي مسول ته يې مبارکي وويله. دوی په خپلو خبرو کې د تلپاتې همکاريو ډاډ ورکړ.
وروسته په لغمان کې د ژورناليستان د ملي اتحادې نوي معرفي شوي مسول عتيق الله قريشي ټولو ګډونوالو ته د ښه راغلاست ويلو ترڅنګ د افغانستان د ژورناليستانو د ملې اتحاديې په اړه مالومات وړاندې کړل، نوموړي په خپلو خبرو کې وويل د ژورناليستانو ملي اتحاديه په کال ۱۳۵۹ لمريز کال کې ايجاد شوې چې د کلونو په تېرېدو سره يې رسنيو او ژورناليستانو ته ګڼ خدمتونه وړاندې کړيدي، چې دا مهال هم دغه اتحاديه د ژورناليستانو په روزنه او د دوی د حقونو د ترلاسه کولو په موخه هلې ځلې کوي.
نوموړي زياته کړه ياده اتحاديه د افغانستان د نورو ټولنو او اتحاديو ترڅنګ د افغانستان د ژورناليستانو د فيدراسيون غړيتوب هم لري او له ټولو امتيازاتو څخه برخمنه ده.
نوموړي په خپلو خبرو کې ډاډ ور کړ چې د ژورناليستانو په همغږي کولو، يوالي او روزنې لپاره کار کوي او له نورو ژورناليستانو څخه يې هم د همغږۍ، يوالي او همکاريو غوښتنه وکړه.
