د بیدار دولتي ورځپاڼې خبریال، قاسم مظفري تېره ورځ د مزار شریف په ښار کې تر برید لاندې راغلی او سخت ټپي شوی دی. مظفري د مزار شریف ښار په کارته مامورین سیمه کې د ګزارش ورکولو په حال کې تر برید لاندې راغلی او په چاقو باندې ټپي شوی دی.
د بیدار ورځپاڼي مسوولینو ویلي دي، چې تراوسه نه پوهېږي چې د دغه برید دلیل څه وو او برید کوونکي څوک دي.
د بیدار ورځپاڼې مسوول مدیر، بیژن برناویج په وینا، هغوی له امنیتي ځواکونو سره په اړیکه کې دي، ترڅو د برید کوونکو هویت په ډاګه شي.
د بلخ ولایت امنیتي چارواکي وایي، چې پدې اړه یې خپلې څېړنې پیل کړې، مګر د دغه برید د دلیلونو او د برید کوونکو د معلومولو کومه نښه لاسته نده ورغلې.
مظفري، چې په لاس، پښه او خېټه ټپي شوی دی، په روغتون کې بستر دی.
په بلخ کې د افغانستان د ژورنالیستانو د ملي اتحادیې مسوولین وایي، چې هڅه کوي ترڅو د ښاغلي مظفري د همکارانو په مرستې سره د قضیې د عاملینو د نیولو لپاره غوښتنه وکړي او د یاد ولایت په امنیتي بنسټونو فشار راولي ترڅو قضیه ژر تر ژره روښانه شي.
