تازه راپورونه دا په نښه کوي، چې د اطلاعات او کلتور وزارت هغه طرحه چې د رسنیو د محدودیت لپاره یې برابره کړې ده، نن یې د وزیرانو شورا ته وړاندې کوي.
دا طرحه، له هغه وروسته چې د وزیرانو شورا د تېرې اونۍ په ناسته کې ولسمشر کرزي د یو شمېر رسنیو نشرات د ملي ګټو خلاف ګڼلي وو او اطلاعات او کلتور وزارت ته یې امر ورکړی وو، تر څو لدې رسنیو سره جدي چلند وکړي ، د اطلاعات او کلتور وزارت له لوري برابره او د ولسمشریزو چارو ادارې ته لېګل شوې وه.
د ولسمشریزو چارو له ادارې څخه ویاند رفیع فردوس تېره اونۍ د چهارشنبې په ورځ وویل، چې اطلاعات او کلتور وزارت دا رنګه یوه طرحه برابره کړې ده او د چارو ادارې ته یې لېګلې ترڅو د وزیرانو شورا ناستې ته وړاندې شي.
فردوس په هغه خبرو کې، چې تېره چهارشنبه یې له بي. بي. سي رادیو سره لرلې وویل، نږدې ده چې د دغه طرحې په اړه له رسنیزو کارکوونکو، د خبریالانو صنفي بنسټونو، مدني ټولنې او د چارو له کارپوهانو څخه نظرونه وغوښتل شي.
په همدې حال او د تازه راپورونو پر اساس، یاده طرحه بېدون لدې چې نظرونه پرې ورکړل شي او یا یې هم جزیات پاش شي د وزیرانو شورا ته لېږل شوې ده.
رسنیز کارکوونکي پداسې حال کې، چې په هېواد کې د بیان آزادۍ او د آزادو رسنیو د محدویت په لار کې د حکومت او په ځانګړې توګه د اطلاعات او کلتور وزارت تازه هڅې غندي، وایي چې دا هڅې کولای شي چې زموږ په رسنیزه فضا باندې منفي تاثیر واچوي.
د افغانستان د ژورنالیستانو د ملي اتحادیې ویاند، سید محمد علي رضواني وایي: زموږ په اند د دغه طرحې برابرول او د وزیرانو شورا ته لېږل، دا د یوه تازه روند پیل دی چې حکومت غواړي ترڅو له مختلفو وسیلو څخه په کار اخیستلو سره په رسنیو فشار راوړي او په هېواد کې د بیان د آزادۍ مخه ونیسي.
