د ټولیزو رسنیو د قانون د دریمې مادې د شمولو بنسټونو یو شمېر مسوولینو نن په یوه ناسته کې ګډون وکړ، چې د دوی د مالي جریمو د بښلو په اړه د ولسمشر پر حکم بحث او خبرې وشوې.
پدې ناسته کې د مالیې وزارت، اطلاعات او کلتور وزارت، د برېښنا ریاست، د اترا ادارې او د خبریالانو د حامي او صنفي بنسټونو استازو پکې ګډون کړی وو او د ولسمشر د نوي حکم په اړه یې تشریحات وړاندې کړل.
یاد حکم د روان کال د غوایي په نهمه نېټه صادر شوی او د یوې میاشتې په تېرېدو سره او لدې سره سره چې یاد حکم د دولتي رسنیو له لارې خپور شوی دی، مګر تراوسه د نظر وړ رسنۍ او بنسټونه د خپلو حسابونو د پاکولو لپاره ندي حاضر شوي. نو د دغه حکم د جزییاتو د مفصلې تشریح کولو پخاطر د نن ورځې ناسته ترسره شوه.
د ولسمشر د حکم پر بنسټ د ټولیزو رسنیو قانون د ۱، ۲، ۳، ۴، ۶، ۸، ۹، ۱۰، ۱۱، ۱۲، ۱۳، ۱۷، ۱۸، او ۱۹ بندونو شمول بنسټونه او رسنۍ د مخکنیو کلونو د مالي جریمو له ورکړې معاف شوي او د دوی اصلي باقیدارۍ په اوه کاله قسط سره اخیستل کیږي.
نږدې ۳ زره بنسټونه د په دغه حکم کې داخل دي، چې مالیاتي باقیدارۍ لري او یا هم د مالیې د نه ورکولو او یا د ځنډ له کبله جریمه شوي دي، د خپل برق مصرف یې ندې ورکړی، د نشراتي جواز د نه نوي کولو پخاطر جریمه شوي دي او یا هم د فریکونسي د فیص له نه ورکولو باقیداري لري او جریمه شوي دي.
د هغه څېړنو پر بنسټ چې د مربوطه ادارو له لوري ترسره شوي دي، د یادو رسنیو او بنسټونو د باقیدارۍ او جریمو مجموعه نږدې ۶۰۰ میلیونه افغانۍ کېږي چې لدې څخه نږدې ۲۸۰ میلیونه افغانۍ د جریمو دي، چې د ولسمشر د نوي حکم پر اساس وبښل شوې او پاتې نورې یې باید په اوه کاله قسط سره تحویل کړل شي.
د اداراتو او بنسټونو استازې چې د دغه بښنې د وړاندېز په جوړولو کې دخیل وو، ټینګار درلود چې د رسنیو د قانون د دریمې مادې شمول بنسټونه او رسنۍ تنها درې میاشتې فرصت لري چې د خپلو حسابونو د پاکولو لپاره دولتي مربوطه ادارو ته مراجعه وکړي.
د افغانستان د ژورنالیستانو د ملي اتحادیې رییس فهیم دشتي وویل: معلومداره خبره ده چې په دریو میاشتو کې نشي کېدلای چې نږدې د ۳ سوه زرو رسنیو او بنسټونو ټولې مالي باقیدارۍ تحویل کړل شي، مګر د رسنیو د قانون د دریمې مادې شمول بنسټونه او رسنۍ دولتي مربوطه ادارو ته په مراجعې سره کولای شي چې د خپلو حسابونو د تصفیې پروسه پیل کړي او که چېرته ټاکل شوې درې میاشتې پای ته ورسېدلې او هغوی مراجعه ونکړي نو نشي کولای چې د ولسمشر د نوي حکم له امتیازونو څخه ګټه واخلي.
د ولسمشر حکم د غوایي د میاشتې په ۹ نېټه صادر شوی او د روان کال د زمري د میاشتې تر ۹ نېټې پورې وخت لري.
