د بامیانو له والي، محمد ظاهر ظهیر سره د افغانستان د ژورناليستانو د ملي اتحادیې د رییس په ليدنه کې، چې تېره اونۍ ترسره شوه، په یاد ولایت کې د فعالو رسنیو او خبریالانو پر ستونزو خبري وشوې.
په بامیانو ولایت کې امنیت په داسې کچه دی، چې د یاد ولایت خبریالان او رسنۍ له هېڅ کومې امنیتي ستونزې سره مخ ندي. د خبریالانو پر وړاندې تاوتریخوالی، د رسنیو مالي ستونزې او په بامیانو ولایت کې د خبریالانو د حامي او صنفي بنسټونو د دفترونو نشتون، د یاد ولایت د خبریالانو او رسنیو له عمده ستونزو څخه ګڼل کیږي.
د بامیانو له والي سره د افغانستان د ژورنالیستانو د ملي اتحادیې د رییس د کتنې په دوام، د بامیانو د والي په بلنې او د یاد ولایت د خبریالانو او رسنیزو فعالانو په ګډون یوه بله ناسته هم ترسره شوه.
پدې ناسته کې ښاغلي اسحاق اکرمي د خبریالانو په استازیتوب وینا وکړه او شته ستونزو ته یې اشاره وکړه.
د بامیانو والي ژمنه وکړه چې د خبریالانو پر وړاندې د تاوتریخوالي د دفع کولو او د دا ډول قضیو د څېړلو لپاره به د حکومت او رسنیو د ګډې کمېټې له لارې، چې په بامیانو کې د ولایت د مرستیال په مشرۍ فعاله ده، رسېدنه وشي.
د افغانستان د ژورنالیستانو د ملي اتحادیې رییس، فهیم دشتي د افغانستان د خبریالانو او رسنیزو بنسټونو په استازیتوب د بامیانو له رسنیو سره د مالي مرستو په اړه وویل: په اکثره ولایتونو کې رسنۍ له دغه ستونزې سره مخ دي. له ولسمشر غني سره په ناسته کې پدې اړه خبرې شوي دي، نږدې ده چې په ملي او سیمه ییزو رسنیو د دولتي بنسټونو د اعلانونو د توزیع لپاره یو میکانیزم جوړ شي، تر څو چې د رسنیو عواید زیاتوالی ومومي.
د خبریالانو د صنفي او ملاتړو بنسټونو د دفتر د نشتون پر ارتباط، ښاغلي دشتي ژمنه وکړه، چې ډېر ژر به په بامیانو ولایت کې د افغانستان د ژورنالیستانو د ملي اتحادیې دفتر فعال کړل شي، تر څو خبریالان وکولای شي چې د کمپیوټر او انټرنيټ د کارولو پشان له دا ډول اسانتیاوو څخه ګټه واخلي او همدارنګه دغه سیمه ییز دفتر د بامیاني خبریالانو د غونډو لپاره وي.
