د ملي امنیت ویاند وایي، چې د دغه ادارې مامورینو د تېرې چهارشنبې ورځې په ځانمرګي برید کې د خبریالانوله وهلو او رټلو بښنه غوښتې.
د چهارشنبې ورځې د ځانمرګي برید د خبري پوښښ په جریان کې، د امنیتي ځواکونو له لوري لږ تر لږه درې تنه خبریالان له فزیکي تاوتریخوالي او یوه ښځینه خبریاله له تحقیر سره مخ شوې ده.
په فیسبوک او نورو ټولنیزو شبکو کې د امنیتي ځواکونو له لوري په خبریالانو د تاوتریخوالي هغه خپور شوو تصویرونو، دې مسلې ته د ډېرو پام اړولی دی.
په دغه تصویرونو کې امنیتي مامورین ښکاري چې دوه خبریالانو په بوکسونو وهي او ښکنځلې ورته کوي.
د ملي امنیت ویاند، طاهري ویلي دي چې له یادو خبریالانو څخه بښنه غوښتل شوې ده.
ښاغلي طاهري ویلي دي: کله چې موږ له سرتېرو سره خبرې وکړې، ویل یې چې موږ دغه چلند په قصدي ډول ندی کړی او موږ لدې چلند څخه پښېمان یو.
نوموړي زیاته کړې: دغه چلند په قصدي توګه نه بلکي په سهوه شوی دی او د همغه اضطراري حالت نتیجه ده.
په ورته وخت کې د خبریالانو یو شمېر صنفي بنسټونو او د بیان د آزادۍ او رسنیو ملاتړو بنسټونو چې پدې وروستیو کې د ( د افغانستان د ژورنالیستانو فدراسیون) تر نامه لاندې راټول شوي دي، اعلام کړی چې ډېر ژر به د هېواد د امنیتي بنسټونو له مسوولینو سره ناسته وکړي ترڅو د تېرې چهارشنبې ورځې په ځانمرګي برید کې د خبریالانو پر وړاندي د تاوتریخوالي وحيړي او د دا ډول پېښو د مخنیوي په باب خبرې وکړي.
د افغانستان د ژورنالیستانو د ملي اتحادیې رییس او د افغانستان د ژورنالیستانو د فدراسیون د رهبرۍ شورا غړی، فهیم دشتي وایي: د امنیتي بنسټونو له مسوولینو سره اړیکه نیول شوې او د دغې اونۍ تر وروستیو به پدې اړه د افغانستان د ژورنالیستانو د فدراسیون د استازو او د امنیتي بنسټونو د مسوولینو په ګډون یوه ناسته ترسره شي.
د ښاغلي دشتي په وینا، نږدې ده چې پدې ناسته کې، د افغانستان د ژورنالیستانو د فدراسیون استازي د امنیتي بنسټونو له استازو سره یوه ځانګړې طرحه شریکه کړي، چې د دواړو لورو د تفاهم په صورت کې کولای شي چې د دا ډول پېښو د تکرار مخه ونیسي.
