د افغانستان د ژورنالیستانو لپاره د اخلاقي موازینو مسوده د روان کال د سلواغې په دوه ویشتمه نېټه برابره شوه.
د اطلاعات او کلتور وزارت د استازو، مخکښو خبریالانو او د افغانستان د ژورنالیستانو د فدراسیون د شاملو بنسټونو د استازو پر ګډون یوه پینځه دېرش کسیزه کمیسیون له دوو میاشتو راهیسې پدې مسوده کار وکړ.
له دې جملې څخه یو اوه کسیزه کمیسیون ګمارل شوی وو، ترڅو د اخلاقي موازینو مجمده متنونه چې په تېرو کلونو کې د خبریالانو یو شمېر صنفي بنسټونو او د رسنیو مدافع او مرستندویه بنسټونو برابر کړي وو، بیا کتنه پرې وکړي او له هغې څخه د یوې نوې مسودې متن برابر کړي.
د اوه کسیزې کمېټې له لوري برابر شوی متن، د اخلاقي موازینو د تسوید کمیسیون په ناستو کې تر بحث لاندې ونیول شو او بالاخره د دغه کمیسیون د یکشنبې ورځې په ناسته کې پداسې حال کې چې د نوې مسودې متن تایید کړل شو، پریکړه وشوه ترڅو د افغانستان د ژورنالیستانو فدراسیون د اطلاعات او کلتور وزارت په همکارۍ او د یوناما په ملاتړ د دغه متن د نهایي تصویب لپاره زمینه برابره کړي.
اوس مهال د افغانستان د ژورنالیستانو فدراسیون د اطلاعات او کلتور وزارت په همکارۍ غواړي چې په راتلونکو میاشتو کې لږترلږه څلور مشورتي غونډې د هېواد په لویو ښارونو( هرات، مزارشریف، ننګرهار او کندهار) کې ترسره کړي.
پدې ناسته کې به دغه څلور واړو ولایتونو ته نږدې د نورو ولایتونو استازي هم ګډون وکړي.
په وروستیو کې، نږدې ده ترڅو له مختلفو ولایاتو او پایتخت څخه نږدې زر تنه خبریالان او رسنیز کارکوونکي کابل ته راوبلل شي، ترڅو د اخلاقي موازینو د تصویب لپاره رایې ورکړي.
