په دوو وروستیو ورځو کې، د هېواد دوه مطرح خبریالان په دوو مواردو کې، له ګواښ لاندې راغلي دي.
په یوه مورد کې د هېواد له مشهورو عکاسانو او مستند جوړوونکو څخه، فرزانه واحدي په بدخشان کې د ښځو په اړه د یوه مستند جوړولو له امله وګواښل شوه.
اغلې واحدي د یوې موسسې د فعالیتونو په اړه یو مستند جوړ کړی دی، کومې چې د ښځو د ظرفیت جوړولو لپاره یې کار کاوه، د ناپېژندو کسانو له لوري چې ځانونه یې د بدخشان ولایت د دولتي ادارو مسوولان معرفي کړي دي، تهدید شوې ،امکان لري چې برید پرې وشي.
په یوه بله قضیه کې، د فعاله ځوانانو د اونیزې مدیر مسوول او په کابل پوهنتون کې د ژورنالیزم استاد، حامد عبیدي په یاده اونیزه کې د یوه راپور د خپرولو په دلیل ګواښل شوی دی.
د ښاغلي عبیدي په وینا، ناپېژاندو کسانو چې ځانونه یې د ولسي جرګې د یوه وکیل خپلوان معرفي کړي دي، د نوموړي د تلیفون له لوري یې اخطار ورکړی چې د ځان خیال د ساتي او خبر یې ورکړی چې خپرندویه یې ورته بندوي.
په هېواد کې د خبریالانو د حقونو مدافع بنسټونه وایي، که چېرته د دې ډول تهدیدونو مخنیوی ونشي، په هېواد کې به د خبر رسونې کار له جدي ستونزو سره مخ شي.
صدیق الله توحیدي وایي: د ټولو هېوادوالو او په ځانګړې توګه د خبریالانو د امنیت ټینګښت د امنیتي بنسټونو مسوولیت دی، چې باید په پوره ډول سره ټینګ کړل شي.
د افغانستان د ژورنالیستانو ملي اتحادیې هم پداسې حال کې چې اعلام یې کړی، پدې اړه له امنیتي بنسټ،نو سره په اړیکه کي وو، د خبریالانو پر وړاندې تاوتریخوالی یې اندېښمن ښودلی دی.
د نوموړې اتحادیې اجرایوي رییس، فهیم دشتي وایي: له خبریالانو او رسنیو څخه په ملاتړ د اطلاعات او کلتور او د کورنیو چارو د وزارتونو ضعف، د دې لامل شوې چې اوس هر یو بې لاس او بې پښو کسان خبریالان تهدید کوي.
دشتي د دواړو وزارتونو له مسوولینو غواړي، چې په سرعت او جدیت سره دغه ډول ته رسېدګي وکړي تر څو چې له یوې خوا خبریالان وکولای شي چې په اطمنان سره د خبر رسونې کارونه ترسره کړي او له بل لوري ګواښونکي تر جدي پلټنې لاندې ونیول شي.
