د غور ولایت خبریالانو، په یوه ناسته کې په یاد ولایت کې د افغانستان د ژورنالیستانو د ملي اتحادیې مشر وټاکه.
پدې ناسته کې، چې د چاپي، تصویري او صوتي رسنیو څه له باندې څلوېښت تنو خبریالانو پکې ګډون کړی وو د اتحادیې د رییس د ټاکلو ترڅنګ، خبریالانو ژمنه وکړه چې د خپلو حقونو او بیان آزادۍ څخه د دفاع لپاره به یو ځای عمل کوي.
د دې ناستې په وروستیو کې عبدالقدیر غفوري د اتحادیې د مشر په توګه وټاکل شو.
ښاغلي غفوري وویل: د دغه دفتر له جوړولو څخه زموږموخه د بیان آزادۍ پراخوالی، د خبریالانو له مشروع حقونو څخه دفاع او په دغه ولایت کې د خبریالانو د خبر رسونې د ظرفیت لوړوالی دی.
نوموړي زیاته کړه: موږ د دې شاهد یو چې زموږ په ولایت کې د خبریالانو پر وړاندې لویې ستونزې دي او موږ هڅه کوو ترڅو هغه کسانو ته فرصت ورنه کړو کوم چې نه غواړي د بیان آزادي پراخوالی ومومي.
په تېرو کلونو کې اطلاعاتو ته د لاسرسي نشتون او د خبریالانو پر وړاندې ګواښونه د غور ولایت د خبریالانو عمده ستونزې ګڼل کېدې.
د افغانستان د ژورنالیستانو د ملي اتحادیې مرکزي دفتر پداسې حال کې چې د غور ولایت د خبریالانو له دغه لاسته راوړنې هرکلی کوي، ترڅنګ یې اعلام کړی چې تر خپل وسه به د غور ولایت له خبریالانو ملاتړ کوي.
د افغانستان د ژورنالیستانو د ملي اتحادیې اجرایوي رییس، فهیم دشتي وایي: د غور پشان پر یوه لرې پراته ولایت کې د خبریالانو همغږي کېدل یو مثبت پیغام دی.
نوموړي زیاته کړه: د افغانستان د ژورنالیستانو ملي اتحادیه په نظر کې لري ترڅو په مختلفو ولایاتو کې خپل ولایتي دفترونه جوړ او له دې لارې د ولایاتو له خبریالانو څخه د دفاع او ملاتړ زمینه برابره کړي.
