(قلات غږ) رادیو چې د زابل ولایت له مرکز قلات ښار څخه خپرېده، د یاد ولایت د والي له لوري په غیر قانوني ډول تړل شوې او خپرونې یې درول شوې دي.
د طالبانو له سقوط وروسته، دا لومړی ځل دی، چې د دولتي چارواکو له لوري یوه رادیو تړل کېږي.
د زابل ولایت د والي له لوري د قلات غږ رادیو خپرونې وروسته له هغه بندې شوې کله چې نوموړې رادیو
د یادې رادیو مسوول او خبریالان د پولیسو له لوري د څلورو ساعتونو لپاره د پولیسو له لوري نیول شوي وو؛ که څه هم هغوی بېرته خوشي کړل شول د هغوی نشرات له درې ورځو راپدې خوا درېدلي دي.
د دغه سیمه ییزي رادیو تړل کېدل کېداشي چې د افغانستان نورو سیمه ییزو رادیو ګانو ته د خطر زنګ وي او امکان لري چې نور دولتي چارواکي هم د رسنیو پر وړاندې وهڅيږي.
ښاغلي توحیدي وویل: د افغانستان د قانون پر اساس، هېڅ یو دولتي مقام، حتا خپله ولسمشر دا حق نه لري چې د محکمې له حکم پرته په خپل صلاحیت سره کومه رسنۍ وتړي.
هېڅ یو دولتي بنسټ دا حق نه لري چې د رسنیو د فعالیت مخه ونیسي؛ مګر دا چې رسنیزو سرغړونو ته د رسېدنې یو ځانګړی کمیسیون د یوې رسنۍ د تړلو تصمیم ونیسي.
د قلات غږ رادیو مسوول، تیمور شاه شهزاده رسنیو ته ویلي دي، چې د زابل ولایت چارواکو نوموړي ته ویلي د هغه راپورونو د خپرولو په دلیل د دې رسنۍ نشرات بند کړل شوي؛ کوم چې د افغانستان دولت د سیاست خلاف دي.
د شهزاده په وینا، په خپور شوي راپور کې پدې ولایت کې د اداري فساد پر وړاندې د لاریون پوښښ، د یاد ولایت د چارواکو د غوسي لامل شوی.
د زابل ولایت د پولیسو امنیه قومندان، غلام سخي روغ لیوني پداسې حال کې چې د دغه رادیو تړل کېدل تایید وي ویلي دي: دغه رادیو د آیساف مربوط ده او دغه ځواکونو د کارکوونکو معاشونه ندي ورکړي او دغه امر د رادیو د تړلو سبب شوی دی.
نوموړي د خبریالانو نیول کېدل رد کړي: خبریالان د دې په خاطر چې د آیساف تصمیم دوی ته ښکاره شي، د یو څه وخت لپاره په تمه شوي او د دوی د نیول کېدلو خبر سم نه دی.
