د پولیسو مامورینو په شمال ختیځ زون کې د یک تلویزیون خبریال وهلی دی.
د یک تلویزیون خبریال، نصیر صادق چې د تالقانو ښار ته تللی وو د پولیسو له لوري وهل شوی وو، ښاغلی صادق وایي چې پولیسو د نوموړي د کار یوه برخه وسایل او د موټر شیشې ورته ماتې کړي او موټر ته یې نور زیانونه هم رسولي دي.
په شمال ختیځ زون کې د افغانستان د ژورنالیستانو د ملي اتحادیې مسوول، دیان احمدي وايي، چې دا پېښه نن له غرمې وروسته پېښه شوې ده.
د تخار امنیه قومندان، خیر محمد تېمور د افغانستان د ژورنالیستانو له ملي اتحادیې سره په خبرو کې له دې پېښې ناخبري ښودلې او ژمنه یې کړې چې د قضیې له څېړلو وروسته به د قضیې ټول معلومات د افغانستان د ژورنالیستانو د ملي اتحادیې په اختیار کې ورکړي؛ مګر نوموړي ورسته خپل تلیفون بند او اتحادیه له ډېرو هڅو سره سره له نوموړي سره د بل ځل اړیکې په ټینګولو بریالۍ نشوه.
د یک تلویزیون مسوول، سمیع الله مهدي وایي: ښاغلي صادق وړاندې د تخار بولیسو قومندان پر وړاندې د خبریالانو تظاهرات په پراخ ډول پوښښ کړي وو، او د نوموړي په وینا، د تخار پولیسو له هغه سره عقده نیولې او امکان لري چې دا پېښه له هغې عقدې یره رابطه ولري.
د افغانستان د ژورنالیستانو ملي اتحادیي همدارنګه د اطلاعات او کلتور او کورنیو چارو وزارتونو له مسوولینو په ځانګړې توګه له ښاغلي یاري او ښاغلي مبارز راشیدي سره اړیکې نیولې، یادو مقامونه ژمنه کړې چې قضیه به په جدیت سره تعقیبوي.
