په هرات کې د مژده سیمه ییزې رادیو خبریال، علي اصغر یعقوبي نن وروسته له غرمې د نا معلومو کسانو له لوري ویشتل شوی او ټپي شوی دی.
عیني شاهدانو ویلي، چې دوې مرمۍ د ښاغلي یعقوبي پر موټر او یوه مرمۍ هم د نوموړي په سینه لګېدلې ده.
دا پېښه نن څلور بجې د هرات ښار د اولې ناحیې اړوند (ګج ناحیه) کې رامنځته شوې ده. یعقوبي له دې پېښې وروسته د هرات مرکزي روغتون ته د تداوۍ لپاره لېږدول شوی او تر تداوۍ لاندې دی.
په هرات کې د افغانستان د ژورنالیستانو د ملي اتحادیې مسوول، قدیر شاهین وایي، چې تراوسه د بریدګړو هویت ندی په ډاګه شوی، په هرات کې امنیتي ځواکونه وایي هغوی تراوسه پدې اړه کومه نښه نده ترلاسه کړې.
مګر یعقوبي په خپلو خبرو کې ویلي دي، چې په یوه موټرسایکل باندې ناستو دوو کسان د نوموړي موټر ته نږدې شوي او ډزې یې پرې کړي دي.
د قدیر شاهین په وینا، له دې پېښې وروسته د هرات اکثره خبریالان روغتون ته راغلي او په هڅه کې دي ترڅو له امنیتي ځواکونو سره په همکارۍ په ښاغلي یعقوبي باندې د برید کوونکو یوه نښه او د برید دلیل پیدا کړي.
نوموړی وایي: د خبریالانو اوسنۍ پریکړه دا ده چې سبا به د ولایت ودانۍ په وړاندې په تظاهراتو لاس پورې کړي، له امنیتي ځواکونو څخه د دوی غوښتنه دا ده، چې ډېر ژر قضیه وڅېړي او عاملین یې ونېسي.
