د هېواد ولسمشر، حامد کزي اطلاعات او کلتور وزارت ته امر کړی، چې د مبتذېلو تلویزیوني خپرونو د خپرولو مخه ونیول شي.
ولسمشر دا امر وروسته له هغې صادر کړ، چې د هېواد د علما وو شورا له ده سره په ناسته کې، د هېواد په رسنیو کې د ځينو خپرونو، سریالونو او فلمونو خپرول مبتذل وګڼل.
په هغه وړاندېزونو کې چې د علماوو شورا پدې اړه ولسمشره ته وړاندې کړي راغلي دي: د مبتذلو فلمونو خپرول ورځ تربلې ډېریږي، دا سې زیات تلویزیونونه دي چې هره ورځ مبتذلاتو ته مخ اړوي او زموږ د خلکو لپاره غیر اخلاقي فلمونه خپروي، چې بغیر له فحشا څخه بل هدف نلري.
د یادې شورا غړو ولسمشر ته ویلي، چې د دا ډول خارجي سریالونو او فلمونو خپرول له فرهنګ او دیني ارزښتونو سره په ټکر کې دي.
دا لومړی ځل ندی چې د عالمانو شورا د یو شمېر تصویري رسنیو له محتوا سره مخالفت اعلام کوي.
له دې وړاندې د عالمانو شورا، د افغانستان رسنیو ته اخطار ورکړی وو، چې خارجي سریالونه خپاره نه کړي.
اوس مهال د د یادې شورا غړو له ولسمشر غوښتي، چې د فرمان له صادرولو وروسته، هره رسنۍ چې له دې امر سرغړونه کوي بنده شي.
د رسنیو او د بیان آزادۍ مدافع او د خبریالانو صنفي بنسټونو د عالمانو شورا له وروستیو غوښتنو او د ولسمشر له فرمان څخه اندېښنه اعلام کړه.
د افغانستان د ژورنالیستانو ملي اتحادیې اعلام کړی، چې د رسنیو د خپرونو په اړه هېڅ کومه نوې پرېکړه باید د بیان آزادۍ په محدویت باندې ترسره نشي.
د یادې اتحادیې اجرایوي رییس، فهیم دشتي وایي: د ټولیزو رسنیو قانون د حکمونو پر اساس، باید د ټولیزو رسنیو کمیسیون جوړ شي که چېرته یو څوک یا یو بنسټ له رسنیو څځه شکایت وکړي، کولای شي چې خپل شکایت د دغه کمیسیون له لاري وڅېړي.
په هغه اعلامیه کې چې د دغه اتحادیې له لوري خپره شوې راغلي دي، ولسمشر باید د دغه امرونو د صادرولو پر ځای اطلاعات او کلتور وزات خپلو مسوولیتونو ته متوجه کړي.
صدیق الله توحیدي وایي، چې ولشمر د قانون خلاف د رسنیو په خپرونو د محدودیت امر صادر کړی دی.
د توحیدي په وینا: د افغانستان رسنۍ، د هېواد د اساسي قانون او د ټولیزو رسنیو د قانون پر اساس فعالیت کوي، ولسمشر او اطلاعات او کلتور وزات نشي کولای چې د هېواد له قانون پورته حکم صادر کړي.
