نن د افغانستان د ژورنالیستانو د ملي اتحادیې په دفتر کې د یادې اتحادیې او نورو بنسټونو: هشت صبح ورځپاڼې، اطلاعات روز ورځپانې، آرمان ملي ورځپاڼې، د پیک تحقیقي خبریالۍ بنسټ، سلام وطندار رادیو، آزادۍ رادیو، پژواک خبري آژانس، کهکشان رسنیز مرکز، مسیر ورځپاڼې، IWPR د تحقیقي خبریالۍ آژانس، سپوژمۍ رادیو، سار رادیو، هشدار رسنۍ، Heart of Asia ورځپاڼې، او د نی بنسټ ترمنځ یوه ګډه ناسته ترسره شوه.
په دې ناسته کې، د افغانستان د رسنیو ترمنځ د همغږۍ او همکارۍ د کلتور جوړولو په طرحه بحث وشو. د افغانستان د ژورنالیستانو ملي اتحادیې حاضرو رسنیزو بنسټونو ته د یوه خاص مدیریتي سیستم په چوکاټ کې د همکارۍ د پروسې له وړاندې جوړه شوې طرحه وړاندې کړه، له نېکه مرغه رسنیزو بنسټونو له دې طرحې خپل موافقت اعلام کړ.
یاده طرحه، د یوه پرېکړه لیک په چوکاټ کې دا ښکاره کوي چې د دغه برنامې شامل بنسټونه یا رسنۍ څنګه کولای شي چې له یو او بل سره همکاري او همغږي ولري. په ځانګړې توګه د تحقیقي راپورونو د تولید په برخه کې. د افغانستان د ژورنالیستانو ملي اتحادیه د رسنیو ترمنځ د یوه همغږي کوونکي بنسټ په حیث رول لوبوی.
په یاده برنامه کې د نورو رسنیو د ګډون زمینه آزاده ده. هره رسنۍ کولای شي چې په دې برنامه کې ګډون وکړي. په دې اړه په یاده برنامه کې د شاملو بنسټونو له لوري هېڅ ډول ممانعت شتون نه لري.
دا په داسې حال کې ده، چې د افغانستان د مطبوعاتو د کورنۍ په اوسنيو شرایطو کې د نورو مهمو موضوعاتو ترڅنګ، د دوی له لومړیتوبونو څخه یو هم د رسنیو نږدې والی او له یو او بل سره همکاري او همغږي ده. په حقیقت کې د رسنیو ترمنځ د همغږۍ او همکارۍ کلتور په رسنیو باندې د مثبت تاثیر زمینه او د افغانستان د مطبوعاتو د کورنۍ بقا تضمین کوي.
