د هرات ولایت خبریالانو، د بیان آزادۍ له ورځې څخه د لمانځنې سره سم په یاد ولایت کې د رسنیزو بنسټونو ګډه کمېټه هم جوړه کړه.
په هغه ناسته کې چې تېره شپه د هرات ولایت د لسګونو تنو خبریالانو په حضور ترسره شوې وه، دغه کمېټه جوړه شوه. په دغه کمېټه کې له خبریالانو څخه د ملاتړ ۱۱ ملي، سیمه ییز او نړیوال بنسټونه غړیتوب لري.
په هرات کې د افغانستان د ژورنالیستانو د ملي اتحادیې مسوول، قدیر شاهین وایي: د رسنیو او خبریالانو پروړاندې د شته ستونزو د منځه وړل، د خبریالانو د سرغړونو څېړل، د خبریالانو پروړاندې د تاوتریخوالي د دوسیو څېړل او د خبریالانو د ظرفیت لوړولو پروګرامونه او همدارنګه د خبریالۍ اخلاقي مسایل د دغه ګډې کمېټې له مهمو موخو څخه ګڼل کېږي.
په کابل کې د خبریالانو د صنفي او ملاتړو بنسټونو مسوولینو، په هرات کې د خبریالانو له وروستي اقدام څخه هرکلی کړی او هغه یې د نورو ولایاتو لپاره یوه نمونه بللې ده.
د افغانستان د ژورنالیستانو د ملي اتحادیې اجرایوي رییس او د افغانستان د ژورنالیستانو فدراسیون د بورډ غړی فهیم دشتي وایي: موږ په کابل کې یو نوښت کړی دی او د افغانستان د ژورنالیستانو د فدراسیون تر چتر لاندې د خبریالانو صنفي او ملاتړي ۹ بنسټونه راټول شوي یو او دا دی اوس زموږ همکارانو په هرات کې داسې یو نوښت کړی دی. د دشتي په وینا، که دې ته ورته کړنې په نورو ولایاتو کې هم تعقیب شي، بې له شکه کولای شي د خبریالانو د صنفي حقونه تامین او همدارنګه په هېواد کې د بیان آزادۍ د تامینېدلو ضامین شي.
هرات ولایت له کابل څخه دویم ولایت دی چې زیات شمېر تصویري، غږیزې او چاپي رسنۍ لري.
د تېرې یوې میاشتې په لړ کې، پدې ولایت کې د خبریالانو پروړاندې د تاوتریخوالي او بدچلند څلور پېښې رامنځته شوي دي.
په ورستۍ پېښه کې، د دغه ولایت یو مخکښ خبریال، جعفر یعقوبي د وسلوالو کسانو له لوري تر برید لاندې راغلی او په جپ ولي ټپي شوی دی. ښاغلی غفوري، د خبریالانو پروړاندې د تاوتریخوالي په برخه کې د دولتي ارګانونو د بې غوړۍ په نیوکې سره وایي: دولتي مسوولینو، له ماڅخه چې د هرات په اطلاعات او کلتور ریاست کې هم مسوولیت لرم ساتنه ونه کړه. نو د خصوصي رسنیو له خبریالانو به څه ډول ساتنه وکړي.
همدارنګه په هرات کې د رسنیزو بنسټونو مسوولین وایي، د خبریالانو پر وړاندې د تاوتریخوالي د پېښو په روښانه ولو کې تراوسه پورې دولتي ادارو او امنیتي بنسټونو هېڅ ډول ځواب ندی وړاندې کړی.
په همدې حال، په هرات کې رسنیز مسوولین په دې ولایت کې د خبریالۍ د حالت په بیانولو سره له نړیوالو بنسټونو څخه د زیات ملاتړ غوښتونکي دي.
په هرات کې د رسنیزو بنسټونو د ګډې کمېټې غړي:
د افغانستان د ژورنالیستانو ملي اتحادیه
له خبریالانو څخه د ملاتړ مرکز
د خبریال کور
په هرات کې د خبریال د خوندیتوب کمېټه
نی د خپلواکو رسنیو ملاتړ کوونکی بنسټ
د میدیوتیک دفتر استازی
د هرات د اطلاعات او کلتور ریاست استازی
د سفما استازی
د هرات د چاپي رسنیو انجمن
کانون ژورنالیستان جوان دانشګاه
انجمن ژورنالیستان شورای متخصصان
د وړاندیز شوې کړنلارې پر اساس، د رسنیزو بنسټونو ګډه کمېټه د افغانستان په لویدیځ کې د لویدیځې حوزې په ځانګړې توګه د هرات د ټولو رسنیو د استازي په توګه، مسوولیت لري ترڅو د هر ډول قانون ماتونې، بې پروایي، غفلت او د نورو مواردو پروړاندې به بې طرفه اقدام کوي او له سرغړوونکو او له ناوړه ګټه اخیستونکو خبریالانو څخه به پوښتنه کوي او پدې اړه د استاندو او مستندونو د لاسته راوړلو په صورت کې به، سرغړوونک رسنۍ او خبریالان به قانوني سرچینو ته ورپېژني.
کمېټه، مکلفه ده چې د خبریالانو او غیر دولتي رسنیو په کړنلاره کې د لازمو شفافیتونو د رامنځته کولو لپاراخلاقي او حرفوي سپارښتني تبلیغ کړي.
کمېټه، باید د خبریالانو د ظرفیت لوړولو لپاره ایمني او حرفوي مشورې برابرې او د خبریالانو او رسنیزو کارکوونکو په اختیار کې یې ورکړي.
