د نجراب غږ رادیو خبریال له تښتولو دوې اونۍ وروسته، تېره شپه د نوموړي مړی د کاپیسا ولایت نجراب ولسوالۍ کې خپل کورته نږدې وموندل شو. د ښاغلي هاشمي د کورنۍ غړو ویلي، له دې سره سره چې دوی د هاشمي له تښتولو امنیتي ځواکونو ته خبر ورکړی وو؛ مګر یادو امنیتي ځواکونو د تښتوونکو هېڅ کومه نښه ترلاسه نکړه. د ښاغلي هاشمي مېرمنې سیمه ییزو رسنیو ته ویلي، چې خاوند یې له څو میاشتو راپدې خوا د تلیفوني اړیکو په وسیله تهدید کېده او دوی له دغو تهدیدونو څخه هم امنیتي ځواکونو ته خبرورکړی وو.
د کایسا ولایت امنیتي مسوولینو پداسې حال کې چې وایي، د ښاغلي هاشمي مړی د څېړنو لپاره طب عدلي ته استول شوی، پدې قتل کې د لاس لرو په تور یې د څو کسانو د نیول کېدو خبر ورکړی دی؛ مګر تراوسه حاضر شوي نه دي چې د دې قتل د احتمالي انګېزو په اړه جزیات وړاندې کړي.
د کاپیسا د امنیه قومندان مرستیال وایي: د دغه قضیې د عاملینو د پیژندلو لپاره د امنیتي ځواکونو هڅې جریان لري.
د دنیا رسنیز ګروپ مسوول، احمد هنایش وايي د ښاغلي هاشمي وژل کېدل د کاپیسا او پروان ولایت د خبریالانو په روحیه باندې منفي اغېزه کړې، نوموړی زیاتوي: په پروان او کاپیسا ولایتونو کې رسنیز مسوولین هڅه کوي ترڅو له امنیتي ځواکونو سره په تفاهم د دغه پېښې په اړه زیات جزیات ترلاسه کړي.
هاشمي د دې ترڅنګ چې په تخنیکي چارو کې له نجراب غږ رادیو سره همکاري لرله، له دغه رادیو سره د یوې تفریحي خپرونې مسوول هم وو.
