په هغه ناسته کې چې تېره ورځ په اطلاعات او کلتور وزارت کې ترسره شوه، د ترهګریزو پېښو او جګړې د خبري پوښښ لارښود بشپړ شو.
دغه لارښود د افغانستان د ژورنالیستانو او رسنیزو بنسټونو د فدراسیون په وړاندیز طرحه شوی وو او د حکومت او رسنیو د ګډې کمېټې په مختلفو ناستو کې وڅېړل شو.
په تېرو میاشتو کې، د یاد لارښود له ځينو برخو سره د رسنیو د یو شمېر مدیرانو مخالفت، د دغه لارښود د تصویب مخه نیولې وه او په هغه ناسته کې چې تېره ورځ د اطلاعات او کلتور وزارت د نشراتي مرستیال په مشرۍ او د امنیتي بنسټونو د استازو، د رسنیو د یو شمېر مدیرانو او د فدراسیون د استازو په ګډون ترسره شوې وه، بشپړ شو.
د افغانستان د ژورنالیستانو د ملي اتحادیې رییس او د ژورنالیستانو او رسنیزو بنسټونو د فدراسیون د رهبرۍ غړی، فهیم دشتي وایي: اکثره وخت به د ترهګریزو پېښو او جګړې د خبري پوښښ په جریان کې د امنیتي ځواکونو او خبریالانو ترمنځ ستونزې رامنځته کېدلې، چې پای به یې د خبریالانو وهل او د هغوی د وسایلو او تجهیزاتو ماتول وو او همدا دلیل وو چې موږ حکومت ته د دغې طرحې وړاندیز وکړ.
د دشتي په وینا، هغه وروستۍ پېښې، چې په هغه کې یو شمېر خبریالانو د ترهګریزو پېښو د خبري پوښښ په جریان کې خپل ځانونه له لاسه ورکړل او یا هم ټپي شول، د دې سبب شوې چې فدراسیون د دغه لارښود د بشپړ کېدلو لپاره خپلې هڅې ګړندۍ کړي.
نوموړی زیاتوي: د دغه لارښود پر بنسټ به له یوې خوا امنیتي ځواکونه او له بل لوري خبریالان د هغو ټکو په رعایت کولو مکلف شي چې له امله به یې تر ممکنه اندازې خبریالانو ته د زیان رسېدلو کچه راښکته شي.
د دغه لارښود پوره متن کولای شئ، چې د افغانستان د ژورنالیستانو د ملي اتحادیې له سایت او د یادې اتحادیې له ټولنیزو صفحو څخه ترلاسه کړئ.
